سپریم کورٹ آف پاکستان نے کوئٹہ میں قتل ہونے والے وکیل عبدالرزاق کے کیس میں چیئرمین پی ٹی آئی عمران خان کو طلب کر لیا۔
رجسٹرار سپریم کورٹ نے چیئرمین پی ٹی آئی کو 9 اگست کے لیے نوٹس جاری کردیا۔
رجسٹرار سپریم کورٹ نے آئی جی بلوچستان، پراسیکیوٹر جنرل، ایڈووکیٹ جنرل بلوچستان کو بھی نوٹس جاری کردیے ہیں۔
مزید پڑھیں
واضح رہے کہ عبدالرزاق شر ایڈووکیٹ کو 6 جون کو کوئٹہ میں فائرنگ کر کے قتل کیا گیا تھا جس کے بعد وزیراعظم کے معاون خصوصی عطا تارڑ نے الزام عائد کیا تھا کہ وکیل کا قتل عمران خان کی ایما پر کیا گیا ہے۔
عطا تارڑ نے الزام لگایا تھا کہ چونکہ عبدالرزاق شر عمران خان کے خلاف سنگین غداری کیس کی پیروی کر رہے تھے اس لیے انہیں قتل کیا گیا۔
بعد ازاں 7 جون کو عبدالرزاق شر کے قتل کا مقدمہ درج کرلیا گیا تھا جس میں پاکستان تحریک انصاف کے چیئرمین عمران خان کو نامزد کیا گیا۔ مقدمہ تھانہ جمیل شہید میں مقتول کے بیٹے کی مدعیت میں درج کیا گیا۔
یہ بھی پڑھیں عمران خان پر وکیل کے قتل کا الزام، عطا تارڑ کو 10 ارب روپے ہرجانے کا نوٹس
پولیس کے مطابق چیئرمین پاکستان تحریک انصاف و سابق وزیراعظم عمران خان کو سینیئر وکیل عبدالرزاق شر کے قتل کے مقدمے میں نامزد کیا گیا ہے جبکہ مقدمے میں قتل اقدام قتل، دہشت گردی کی دفعات سمیت دیگر دفعات بھی شامل کی گئی تھیں۔
واضح رہے کہ عبدالرزاق شر نے سابق وزیراعظم کے خلاف آئین کے آرٹیکل 5 کی خلاف ورزی و آئین کے آرٹیکل 6 سے روگردانی پر درخواست بلوچستان ہائی کورٹ میں دائر کی ہوئی تھی۔
یہاں یہ بات قابل ذکر ہے کہ سابق وزیراعظم ذوالفقار علی بھٹو کو بھی اعانت جرم سے متعلق تعزیرات پاکستان کی دفعہ 109 کے تحت سزائے موت دی گئی تھی۔
