گوادر میں دہشتگردوں نے سیکیورٹی فورسز کے قافلے پر حملہ کیا ہے، اس دوران فورسز نے موثر جوابی کارروائی کرتے ہوئے 2 دہشتگردوں کو ہلا ک کر دیا ہے۔
مزید پڑھیں
پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے حملے کے دوران چھوٹے ہتھیاروں اور دستی بموں کا استعمال کیا۔ دہشتگردوں کے خلاف کارروائی کے دوران کسی فوجی یا عام شہری کو نقصان نہیں پہنچا۔
آئی ایس پی آر کے مطابق پاکستان کی سیکیورٹی فورسز ملک میں امن اور خوشحالی کے دشمنوں کی کوششوں کو ناکام بنانے کے لیے پرعزم ہیں۔
واضح رہے کہ سیکیورٹی فورسز نے 11 اگست کو بلوچستان کے ضلع کیچ کے علاقے مزبند رینج میں بھی خفیہ اطلاع پر ایک آپریشن کے دوران 2 دہشتگردوں کو ہلاک کر دیا تھا۔
یہ بھی یاد رہے کہ گزشتہ ماہ 12 جولائی کو دہشتگردوں کے ایک گروپ نے ژوب گیریژن پر دھاوا بولا تھا۔ دہشت گردوں اور فورسز کے درمیان فائرنگ کے تبادلے میں 3 دہشت گرد ہلاک ہو گئے تھے اور اس دوران 4 جوانوں نے بھی جام شہادت نوش کیا تھا۔
