نگراں وزیرِاعظم انوار الحق کاکڑ نے کہا ہے کہ ان کی حکومت اپنے مختصر دور میں تمام تر توانائیاں ملک کی معیشت کے استحکام اور ترقی کے حصول پر صرف کرے گی۔
جمعرات کو بیرونی سرمایہ کاری بڑھانے کے لیے قائم خصوصی سرمایہ کاری سہولت کونسل (ایس آئی ایف سی) سے متعلق بریفنگ کے دوران نگراں وزیراعظم نے کہا کہ پاکستان میں زراعت، کان کنی و معدنیات، آئی ٹی، توانائی اور دفاعی پیدوار کے شعبے میں بیرونی سرمایہ کاری کی وسیع استعداد موجود ہے۔
قبل ازیں وزیرِ اعظم کو خصوصی سرمایہ کاری سہولت کونسل کے تحت زراعت، کان کنی و معدنیات، آئی ٹی، توانائی اور دفاعی پیداوار میں بیرونی سرمایہ کے مواقع پیدا کرنے کے لیے اقدامات سے آگاہ کیا گیا۔ انہیں ایس آئی ایف سی کے تحت بیرونی سرمایہ بڑھانے اور سرمایہ کاروں کی سہولت کے لیے حکومت کی حکمت عملی کے بارے میں بھی بتایا گیا۔
بریفنگ میں وزیراعظم کو یہ بھی بتایا گیا کہ اس حکمت عملی کے تحت سرمایہ کاروں کو منصوبوں کے لیے ون ونڈو سہولت فراہم کی جائے گی۔
نگران وزیراعظم نے امید ظاہر کی کہ ملکی معیشت کی بہتری کے لیے ایس آئی ایف سی اپنا کلیدی کردار ادا کرے گی، سیاحت اور انفراسٹرکچر کے منصوبوں میں بھی بیرونی سرمایہ کاری کی بے شمار استعداد ہے۔
ان کا کہنا تھا کہ خصوصی سرمایہ کاری سہولت کونسل ایس آئی ایف سی کی چھتری تلے ان شعبوں کی ترقی پر بھی خصوصی توجہ دی جائے گی۔
انوارالحق کاکڑ نے کہا کہ بیرونی سرمایہ کاری کے فروغ کے لیے بین الاقوامی معیار کا انفراسٹرکچر کلیدی اہمیت رکھتا ہے۔ انہوں نے ہدایت کی کہ پاکستان کے توانائی شعبے کی بہتری کے لیے ریگولیٹری اسٹرکچر کو عصری بین الاقوامی تقاضوں سے ہم آہنگ کیا جائے۔
وزیراعظم نے خصوصی سرمایہ کاری سہولت کونسل کو پاکستان کی معاشی ترقی کے لیے امید کی کرن قرار دیتے ہوئے کونسل کے سیکریٹری عملدرآمد جہانزیب خان اور سیکریٹری جمیل احمد قریشی جہانزیب خان کی ملک میں سرمایہ کاری کے فروغ کے لیے کوششوں کو سراہا۔
