کاؤنٹر ٹیررازم ڈیپارٹمنٹ (سی ٹی ڈی) پنجاب نے دہشت گردی کا بڑا منصوبہ ناکام بناتے ہوئے آپریشنز کے دوران کالعدم تنظیموں کے13 مبینہ دہشت گردوں کو گرفتار کر لیا۔
ترجمان کے مطابق سی ٹی ڈی پنجاب نے دہشت گردی کے کسی بھی ناخوشگوار واقعہ سے موثر طریقے سے نمٹنے کے لیے صوبہ بھر کے مختلف اضلاع میں 55خفیہ آپریشنز کیے گئے جس کے دوران 58 مشتبہ افراد سے پوچھ گچھ کی گئی اورکالعدم تنظیموں کے 13مبینہ دہشت گردوں کو گرفتار کر کے ان کے قبضہ سے اسلحہ، دھماکہ خیز و دیگرمواد برآمد کر لیاگیا۔
مزید پڑھیں
گرفتار ہونے والے دہشت گردوں میں جلات خان، جنت خان، کشف رسول، اسرار خان، صاحبزادہ نذیر عبدالسلام، عامر خان، اسد اللہ، معاویہ، امیر خان، ممتاز خان، انور خان اور غلام رحمان شامل ہیں۔
ان افرادکا تعلق کالعدم تنظیموں تحریک طالبان پاکستان، سپاہ صحابہ پاکستان اورالقاعدہ سے ہے، ان مبینہ دہشت گردوں کی گرفتاری لاہور، بہاولپور، گوجرانوالہ، منڈی بہاؤالدین، راولپنڈی، چنیوٹ، قصور اور ملتان میں انٹیلی جنس بیسڈ آپریشن کے دوران عمل میں لائی گئی۔
دہشتگردوں نے تخریب کاری کا منصوبہ بنا رکھا تھا، ترجمان سی ٹی ڈی
دہشتگردوں کے قبضے سے دھماکا خیز مواد 2360 گرام، آئی ای ڈی بم ایک، ڈیٹونیٹرز 11، حفاظتی فیوز تار 26 فٹ، پستول 30 بور ایک، گولیاں 6، جھنڈے 4 ، کالعدم تنظیم کے 71 پمفلٹس،93 اسٹیکرز اور 46 ہزار 475 روپے نقدی برآمد کیے گئے ہیں۔
ترجمان نے کہاکہ دہشت گردوں نے تخریب کاری کا منصوبہ بنا رکھا تھا اور وہ اہم تنصیبات، دہشت گردانہ کارروائی کو ٹارگٹ کرنا چاہتے تھے۔
گرفتار مبینہ دہشت گردوں کے خلاف لاہور، گوجرانوالہ، راولپنڈی، فیصل آباد، شیخوپورہ، بہاولپوراور ملتان میں 10 ایف آئی آرز درج کر کے تفتیش کے لیے ان کو نامعلوم مقام پر منتقل کر دیا گیا ہے۔
رواں ہفتے کے دوران 339 کومبنگ آپریشنز کیے گئے
ترجمان نے مزید کہا کہ رواں ہفتے کے دوران مقامی پولیس اور سکیورٹی اداروں کی مدد سے سی ٹی ڈی پنجاب نے339 کومبنگ آپریشنز کیے گئے ،ان کومبنگ آپریشنز کے دوران4 ہزار 113افراد کو چیک کیا گیا، 34 مشتبہ افراد کو گرفتار، 26 ایف آئی آر درج جبکہ10 بازیابیاں کی گئیں۔
انہوں نے کہاکہ کاؤنٹر ٹیررازم ڈیپارٹمنٹ پنجاب پوری مستعدی سے اپنے ہدف پر عمل پیرا ہے اوردہشت گردی کے ناسور کو جڑ سے اکھاڑ پھینکنے کے لیے پرعزم ہے۔
دہشت گردوں اور ریاست دشمن عناصر کو سلاخوں کے پیچھے پہنچانے کی کوششوں میں کوئی کسر نہیں چھوڑی جائے گی۔
