ملک میں معاشی عدم استحکام کے باعث دیگر کمپنیوں کی طرح گاڑیاں بنانے والی بڑی کمپنی انڈس موٹرز کا سالانہ منافع 39 فیصد کم ہوگیا۔
معاشی عدم استحکام کے باعث پاکستان میں خدمات سرانجام دینے والی کارپوریٹ کمپنیاں بھی مشکلات کا شکار نظر آتی ہیں اور ان کے منافعے میں خاطر خواہ کمی ریکارڈ کی گئی ہے، انڈس موٹرز کا سالانہ منافع 39 فیصد کم ہوکر 9.66 ارب روپے ہوگیا ہے۔
انڈس موٹرز کی جانب سے 30 جون کو ختم ہونے والے سال کے لیے مالی پوزیشن کا اعلان کیا گیا ہے جس میں منافعے میں کمی کا انکشاف ہوا ہے۔
گاڑیوں کے فروخت کے حجم میں اس سال کمی آئی ہے اور انڈس موٹرز کے تیار کردہ گاڑیوں کے یونٹس 58 فیصد کم ہو کر 31,602 رہ گئے ہیں۔
مالی نتائج کے مطابق انڈس موٹرز نے مالی سال21-2022 کے دوران 75,611 یونٹس فروخت کیے تھے جب کہ اس سال معاشی عدم استحکام کے باعث فروخت کافی کم ہوئی ہے۔
سی ای او انڈس موٹرز اصغر جمالی نے کہا کہ پاکستان میں آٹوموبائل انڈسٹری کو بدترین معاشی بدحالی کا سامنا ہے، بلند شرح سود اور زائد ڈیوٹی، ٹیکسوں کی وجہ سے کاروں کی فروخت ٹھپ ہوکر رہ گئی ہے۔
