پشاور: کھیت سے بھٹے چرانے کے الزام میں ایک شخص کی تذلیل، ویڈیو وائرل
پشاور میں مبینہ طور پر مکئی کے بھٹے چرانے پر ایک شخص کی پولیس اہلکار کی سرپرستی میں تذلیل کی گئی جس کی ویڈیو سوشل میڈیا پر گردش کر رہی ہے تاہم پولیس کا کہنا ہے کہ یہ 2 ماہ پرانا واقعہ ہے اور اس کے ذمے داروں کو تلاش کیا جا رہا ہے۔
وائرل ہونے والی ویڈیو میں دیکھا جاسکتا ہے کہ ایک مسلح شخص نے کھیتوں سے مکئی کے بھٹے چرانے کے الزام میں ایک شخص کو منہ کالا کرکے گدھے پر سوار کرایا جس کی ایک باوردی پولیس اہلکار بھی ویڈیو بنا رہا ہے۔
پولیس کا کہنا ہے کہ ویڈیو ممکنہ طور پر پرانی ہے تاہم ملزم کی شناخت ہوچکی ہے۔ ویڈیو پر ایس ایس پی آپریشنزکاشف آفتاب نے نوٹس لیتے ہوئے یونیفارم میں موجود سپاہی اور اس واقعے کے مرکزی کردار کو 24 گھنٹوں میں گرفتار کرنے کا حکم دیا ہے۔
