پاکستان کو نقصان پہنچانے کی ہر کوشش کا منہ توڑ جواب دیا جائے گا، پاک افواج کا یوم دفاع پر عزم

مسلح افواج پاکستان کے سربراہان نے 6 ستمبر یوم دفاع پاکستان کے موقع پر شہدائے وطن اور ان کے لواحقین کو زبردست خراج عقیدت پیش کیا ہے۔

پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کمیٹی، سروسز چیفس اور افواج پاکستان کی جانب سے 58 ویں یوم دفاع و شہدا کے موقع پر شہدا اور ان کے لواحقین کو زبردست خراج عقیدت پیش کیا گیا ہے۔

آئی ایس پی آر نے کہاکہ 6 ستمبر 1965 کو حق و باطل کے معرکے نے یہ ثابت کیاکہ غیور قوم اپنی سرحدوں کی حفاظت کر نے کے لیے ہمہ وقت تیار ہے۔ اس روز مادرِ ملت کے ہزاروں بیٹوں نے اپنی جانوں کا نذرانہ پیش کرتے ہوئے پاک سرزمین کے دفاع کو ناقابلِ تسخیر بنایا۔ آج پوری قوم اُن کی قربانیوں کو سلام پیش کرتی ہے۔

آئی ایس پی آر نے کہا ’ہم بطور قوم اُن تمام شہدا کی قربانیوں کے مقروض ہیں جنہوں نے پاکستان کے پرچم کی سربلندی کے لیے اپنی جانوں کے نذرانے پیش کیے‘۔

’پاکستان کی مسلح افواج ہر طرح کے اندرونی و بیرونی خطرات کے خلاف دفاع وطن کے لیے پرعزم ہیں۔ پاکستان کونقصان پہنچانے کی ہر کوشش کا منہ توڑ جواب دیا جائے گا‘۔