سری لنکا میں کسینو جانے والے پی سی بی کے عہدیداران نے مینجمنٹ کمیٹی کے اظہار وجوہ کے نوٹس کا جواب دے دیا۔
پاکستان کرکٹ بورڈ کے عہدیداران کی ایک ویڈیو سوشل میڈیا پر گردش کر رہی تھی جس میں میڈیا ہیڈ اور جی ایم انٹرنیشنل کرکٹ کسینو میں دیکھے جا سکتے ہیں۔
مبینہ طور پر یہ ویڈیو پاک بھارت میچ سے ایک رات قبل کی تھی اور سوشل میڈیا صارفین کی جانب سے اس ویڈیو پر مختلف تبصرے کیے جا رہے تھے۔
اطلاعات کے مطابق چیئرمین مینجمنٹ کمیٹی ذکا اشرف نے دونوں عہدیداران کو کسینو جانے پر اظہار وجوہ کا نوٹس جاری کیا تھا، جس کا جواب دونوں عہدیدارن کی جانب سے جمع کروا دیا گیا ہے۔
ذرائع کے مطابق پی سی بی عہدیداران نے کسینو جانے پر جاری کیے گئے اظہار وجوہ کے نوٹس کے جواب میں کہا ہے کہ وہ ریسٹورنٹس بند ہونے کی وجہ سے کھانا کھانے ہوٹل گئے تھے اور ہوٹل کے اندر ہی کسینو بھی تھا۔
انہوں نے یہ وضاحت دی ہے کہ سری لنکا میں ریسٹورنٹس جلدی بند ہوجاتے ہیں اس لیے وہ کھانا کھانے ایسے ہوٹل میں گئے جو رات دیر تک کھلے رہتے ہیں۔
ذرائع کا کہنا ہے کہ مذکورہ دونوں عہدیداروں نے اپنے اس عمل پر معافی مانگتے ہوئے آئندہ محتاط رہنے کی یقین دہانی کرائی ہے۔
