انسداد دہشت گردی عدالت کراچی نے 9 مئی کو چیئرمین تحریک انصاف (پی ٹی آئی) عمران خان کی گرفتاری کے خلاف ہنگامہ آرائی اور جلاؤ گھیراؤ کرنے والے سابق رکن قومی و صوبائی اسمبلی فہیم خان اور عدیل احمد سمیت 4 مفرور ملزمان کو اشتہاری قرار دے دیا اور ساتھ ہی ملزمان کے خاکے آویزاں کرنے کا حکم دے دیا۔
انسداد دہشتگردی عدالت نے سماعت کرتے ہوئے مفرور ملزمان کے خاکے آویزاں کرنے اور ان کی جائیداد کی تفصیلات پیش کرنے کا حکم دیتے ہوئے گرفتار سابق رکن اسمبلی راجا اظہر کے پروڈکشن آرڈر جاری کردئیے۔
عدالت نے آئندہ سماعت پر راجا اظہر کو پیش کرنے کا حکم دیتے ہوئے سماعت 2 اکتوبر تک ملتوی کردی۔
مزید پڑھیں
پولیس کے مطابق سابق اراکین قومی و سندھ اسمبلی فہیم خان اور عدیل احمد خان سمیت کارکنان اورنگزیب اور اشفاق مفرور ہیں۔ مقدمہ میں طارق، عامر، عبداللہ، رضون، جاوید، فہد سمیت 13 ملزمان بھی گرفتار ہیں۔
پولیس نے موقف اختیار کیا کہ 9 مئی کو چیئرمین تحریک انصاف کی گرفتاری کی اطلاع پر پی ٹی آئی کے رہنماؤں نے کارکنان کو اشتعال دلوایا۔ تحریک انصاف کے کارکنان نے لاٹھی و ڈنڈوں سے مسلح ہوکر ہنگامہ آرائی کی۔
پولیس کے مطابق پی ٹی آئی کے دیگر4 رہنما جن میں عالمگیر خان بھی شامل ہیں، عبوری ضمانت پر ہیں۔
