حکومت پاکستان نے افغان حکومت سے مطالبہ کیا ہے کہ افغان سرحد پر پار سے فائرنگ کر کے 2 پاکستانیوں کو شہید کرنے والے ملزم کو ہمارے حوالے کیا جائے تاکہ اسے کیفر کردار تک پہنچایا جا سکے۔
نگراں وفاقی وزیر داخلہ سرفراز بگٹی نے اسلام آباد میں پریس کانفرنس کرتے ہوئے کہا ہے کہ پاک افغان سرحد پر پیش آنے والا فائرنگ کا واقعہ قابل مذمت ہے۔ پاکستان کی مسلح افواج دہشت گردوں کے خلاف لڑنے کی بھرپور صلاحیت رکھتی ہیں، دہشت گردی کے خلاف جنگ ہم ہی جیتیں گے۔
مزید پڑھیں
سرفراز بگٹی نے اسلام آباد میں وزیر اطلاعات مرتضیٰ سولنگی، گوہر اعجاز، محمد علی کے ہمراہ پریس کانفرنس کی ہے۔
نگراں وفاقی وزیر داخلہ سرفراز بگٹی نے کہا کہ آج چمن سرحد پر افغانستان کی طرف سے معصوم شہریوں پر فائرنگ کی گئی ہے جس کے نتیجے میں ایک 12 سالہ بچے سمیت 2 افراد شہید اور 2 زخمی ہوئے ہیں۔
انہوں نے کہا کہ ہماری فورسز نے اس واقعہ پر تحمل کا مظاہرہ کیا، ایک ذمہ دار ریاست کا ایسا ہی مظاہرہ ہوتا ہے۔ انہوں نے مزید کہا کہ ہم دہشت گردوں کے خلاف بھرپور طریقے سے لڑ سکتے ہیں اور اس جنگ کو جیت کرملک کے وجود کو دہشت گرد وں سے پاک کریں گے۔
