پاکستان کی اداکارہ و ماڈل نوال سعید نے انکشاف کیا ہے کہ کئی قومی کرکٹرز کی جانب سے انہیں سوشل میڈیا پر میسجز بھیجے جاتے ہیں۔
اداکارہ نے نجی ٹی وی کے ایک پروگرام میں شرکت کی جہاں میزبان کی جانب سے ان کے کیریئر سے متعلق اور دیگر سوالات کیے گئے۔
نوال سعید نے نجی ٹی وی کے پروگرام میں گفتگو کرتے ہوئے کہا کہ میں نے بحیثیت گلوکارہ اپنی پروفیشنل زندگی کا آغاز کیا تھا مگر بعدازاں اداکاری کی طرف آ گئی۔
مزید پڑھیں
اداکارہ نوال سعید نے کہاکہ پاکستانی کرکٹرز کی جانب سے مجھے سوشل میڈیا پر میسیجز بھیجے جاتے ہیں اور یہ سب ان کے ویریفائیڈ اکاؤنٹس سے ہوتا ہے۔
انہوں نے کسی بھی کرکٹر کا نام لیے بغیر کہا کہ آپ لوگ دنیا میں اپنے ملک کی نمائندگی کرتے ہیں، آپ کو بالکل بھی ایسا نہیں ہونا چاہیے، کیوں کہ کسی لڑکی کو میسجز بھیجنا عجیب سی بات ہے۔
نوال سعید کے مطابق قومی کرکٹرز کی جانب سے میسیجز میں ان کی خوبصورتی کی تعریف کی جاتی ہے۔
اداکارہ نے مزید کہا کہ میں نے اپنے دوست اداکار نورحسین کے ساتھ کچھ عرصہ قبل برائیڈل فوٹو شوٹ کروایا تو میرے دوست کے والدین کو رشتہ داروں کے فون آنا شروع ہو گئے کہ آپ نے اپنے بیٹے کی شادی کروا دی ہے مگر ہمیں بتایا تک نہیں۔
نوال سعید نے مزید کہا کہ کبھی نہیں سوچا تھا مجھے اتنی مقبولیت ملے گی، جو لوگ مجھے پسند کرتے ہیں میں ان کی بے حد شکر گزار ہوں۔
