نگراں وزیراعظم پاکستان انوارالحق کاکڑ نے کہا ہے کہ محصولات کی وصولی ملک کی معیشت میں ریڑھ کی ہڈی کی حیثیت رکھتی ہے۔ ٹیکس نظام میں بہتری کے لیے جدید ترین ٹیکنالوجی کا استعمال نا گزیر ہے۔
نگراں وزیر اعظم انوار الحق کاکڑ کی زیر صدارت فیڈرل بورڈ آف ریونیو کی کارکردگی بہتر بنانے سے متعلق اجلاس ہوا جس میں وزیراعظم کو ٹیکس سسٹم کو ڈیجیٹائز کرنے کے حوالے سے بریفنگ دی گئی۔
مزید پڑھیں
اجلاس میں ایف بی آر کی ری اسٹرکچرنگ کے حوالے سے مختلف تجاویز زیر غور آئیں۔
وزیراعظم نے کہاکہ اسمگلنگ کے کنٹرول کے لیے پچھلے دنوں کافی اہم اقدامات اٹھائے گئے ہیں لیکن اس حوالے سے مزید تندہی سے کام کرنا ہو گا۔
انوارالحق کاکڑ نے کہاکہ ایف بی آر کی کارکردگی بہتر بنانے کے حوالے سے تمام اسٹیک ہولڈرز سے مشاورت کی جائے اور اس حوالے سے ایک جامع لائحہ عمل پیش کیا جائے جس میں تمام متعلقہ اداروں کی تجاویز بھی شامل ہوں۔
اجلاس میں نگراں وفاقی وزیر خزانہ ڈاکٹر شمشاد اختر، مشیر وزیر اعظم احد چیمہ، چیئرمین ایف بی آر، وفاقی سیکریٹری خزانہ اور دیگر متعلقہ افسران نے شرکت کی۔
