جنوبی افریقہ کے دارالحکومت کیپ ٹاؤن کے گالف کورس میں ایک خطرناک اور تگڑے کوبرا سانپ کی دبنگ اینٹری کے بعد وہاں گالف کھیلنے میں مصروف کھلاڑیوں کو میدان چھوڑ کر بھاگنا پڑا۔
میڈیا رپورٹس کے مطابق کچھ روز قبل کیپ ٹاؤن کے اٹلانٹک بیچ گالف کلب میں کھلاڑی اور عملہ اس وقت حیران اور خوفزدہ ہوگئے جب اچانک ہی غصے میں بھرا ایک کیپ کوبرا جھاڑیوں سے نکل کر گالف کورس میں گھس آیا۔
View this post on Instagram
اس واقعہ کی ویڈیو انسٹاگرام پر شیئر کی گئی ہے جس میں دیکھا جاسکتا ہے کہ کیپ کوبرا پھن پھیلائے تیزی سے رینگتا ہوا گالف کورس میں گھس آتا ہے اور ایک ٹی باکس (گالفرز کے سائن) کو غصے سے پار کرتا ہوا آگے تک آجاتا ہے۔
یہ کوبرا سانپ اس قدر غصے میں تھا کہ اس نے ٹی باکس سائن کو متعدد بار ڈسا، خوش قسمتی سے تمام کھلاڑی اور عملہ میں شامل افراد اس خطرناک سانپ سے محفوظ رہے۔
ویڈیو میں دیکھا جاسکتا ہے کہ سانپ جس سمت سے گولف کورس کی جانب آرہا ہے وہاں جھاڑیوں کے قریب سانپوں کا ازلی دشمن ایک نیولا بھی موجود ہے جو اس خطرناک سانپ کو گولف کورس کی جانب بڑھتے ہوئے کچھ دیر تک دیکھتا رہتا ہے اور پھر واپس جھاڑیوں میں گم ہوجاتا ہے۔
کچھ لوگوں کا خیال ہے کہ کوبرا کی رفتار اور غصے کی وجہ یہ نیولا بھی ہوسکتا ہے۔
کیپ کوبرا کتنا خطرناک ہے؟
کیپ کوبرا جنوبی افریقہ میں پایا جانے والا ایک انتہائی زہریلا سانپ ہے، اس کی لمبائی ساڑھے 4 فٹ تک ہوسکتی ہے اور یہ اپنے زہر اور غصے کی وجہ سے مشہور ہے۔ اسے افریقہ کا خطرناک ترین سانپ قرار دیا جاتا ہے کیونکہ اس کے ڈسنے سے افریقہ میں سب سے زیادہ اموات واقع ہوتی ہیں۔
