لاہور ٹریفک پولیس کا کم عمر افراد کی ڈرائیونگ کےخلاف بڑے پیمانے پر کریک ڈاؤن جاری ہے جس کے دوران گزشتہ 4 روز میں ایک ہزار 632 مقدمات درج اور سینکڑوں گاڑیاں تھانوں میں بند کردی گئیں۔
کم عمر بچوں کو گاڑی یا موٹرسائیکل دینے والوں کےخلاف بھی مقدمہ درج ہوگا۔ علاوہ ازیں بغیر لائسنس گاڑی و موٹرسائیکل والوں پر بھی مقدمات درج کیے جار ہے ہیں۔
سی ٹی او لاہور مستنصر فیروز نے والدین سے کہا ہے کہ وہ 18 سال سے کم عمر افراد کو ہرگز گاڑی، موٹرسائیکل نہ چلانے دیں بصورت دیگر اپنے بچوں کے مستقبل کے خود ذمہ دار ہوں گے۔
مستنصر فیروز نے کہا کہ کریمنل ریکارڈ بننے سے سرکاری نوکری اور ویزہ حصول میں مشکلات آسکتی ہیں۔
ان کا کہنا تھا اب کم عمر ڈرائیورز کے خلاف ایف آئی آر درج ہو گی۔ ان کا مزید کہنا تھا کہ والدین اپنی ذمہ داری نبھائیں اور اپنے کم عمر بچوں کو ڈرائیونگ کی اجازت ہرگز نہ دیں۔
