استحکام پاکستان پارٹی کراچی میں بھی متحرک ہوگئی ہے جہاں اس نے تحریک انصاف کو سیاسی جھٹکا دیتے ہوئے بیک وقت اس کی 32 وکٹیں اڑا دی ہیں۔
کراچی میں میئر کے انتخاب پر منحرف ہونیوالے تحریک انصاف کے 32 یونین کونسل کے چیئرمینوں نے استحکام پاکستان پارٹی میں شمولیت اختیار کرلی ہے۔
رات گئے استحکام پاکستان پارٹی کے صوبائی صدرمحمود مولوی کے گھر اہم بیٹھک میں تحریک انصاف کے سندھ کے ارکان بھی شریک ہوئے، استحکام پاکستان پارٹی کے سندھ کے جنرل سیکریٹری علی جونیجو بھی اس موقع پر موجود تھے۔
استحکام پاکستان پارٹی میں شامل ہونے والوں میں کے ایم سی میں تحریک انصاف کے ٹکٹ پر منتخب ہونے والے اسد امان اور ان کے ساتھ 31 دیگر یوسی چیئرمین شامل ہیں، علی جونیجو نے پی ٹی آئی کے رہنماؤں کو اپنی جماعت میں شمولیت پر خوش آمدید کہا۔
استحکام پاکستان پارٹی میں شمولیت اختیار کرنے والے پی ٹی آئی سے میئر انتخاب میں منحرف ہوچکے تھے، شمولیت اختیار کرنے والوں میں اسد امان ، صلاح الدین ، زبیر موسیٰ ، عمران پروانی، عمران قریشی، ریاض خان، عبدالوسیم، علی رضا، سلمان، عبدالرحمن، ادریس شامزئی، سلمان، عزیز اللہ شامل ہیں۔
دیگر چیئرمینوں سمیت منیب الرحمن ، عبدالمعید ایڈووکیٹ ، طاہر پرویز ، عاطف حیات ، صنوبر فرحان ،اسلم نیازی ، گلفام، عاصم حیدر، اختر گل شیر ، امجد ، عبدالغنی نے بھی استحکام پاکستان پارٹی میں شمولیت کا اعلان کیا ہے۔
تحریک انصاف کے مذکورہ یوسی چیئرمینوں نے جماعت اسلامی کے حافظ نعیم الرحمان کی میئر کے عہدے کے لیے حمایت سے انکار کیا تھا اور ان کی جانب سے میئر کے انتخابات کے بائیکاٹ کے باعث پیپلز پارٹی کے مرتضی وہاب میئر کراچی بن گئے تھے۔
