آفیشل سیکرٹ ایکٹ خصوصی عدالت نے سائفر کیس کی سماعت اڈیالہ جیل راولپنڈی میں کرنے کا تحریری حکم نامہ جاری کر دیا ہے۔ خصوصی عدالت کے جج ابوالحسنات محمد ذوالقرنین نے تحریری حکم نامہ جاری کیا۔
حکمنامے کے مطابق آج کی سماعت کے دوران چیئرمین پی ٹی آئی اور شاہ محمود قریشی غیر حاضر رہے۔ 23 نومبر کو سپرٹنڈنٹ اڈیالہ جیل کو دونوں ملزمان کو پیش کرنے کا حکم دیا گیا تھا۔ سپرنٹنڈنٹ اڈیالہ جیل کی جانب سے عدالت میں سیکیورٹی رپورٹ پیش کی گئی۔ رپورٹ اسلام آباد پولیس، آئی بی اور اسپیشل برانچ کی معلومات کی بنیاد پر تھی۔
رپورٹ کے مطابق سابق وزیراعظم چیئرمین پی ٹی آئی عمران خان کی جان کو شدید خطرہ لاحق ہے۔ عدالت کی جانب سے سپرنٹنڈنٹ اڈیالہ جیل کی رپورٹ کا بغور جائزہ لیا گیا۔ رپورٹ سے ظاہر ہے کہ چیئرمین پی ٹی آئی کی جان کو لاحق خطرات میں اضافہ ہوا ہے۔ عدالت سابق وزیراعظم کی جان کو لاحق خطرات کی تشخیص کو ہلکا نہیں لے سکتی۔
ماضی میں چیئرمین پی ٹی آئی کے کارکنان کا جوڈیشل کمپلیکس پر دھاوا بولنے کا واقعہ بھی رونما ہوچکا ہے۔ جوڈیشل کمپلیس میں سماعت چیئرمین پی ٹی آئی کے لیے محفوظ ہے نہ ہی دیگر افراد کے لیے۔
مذکورہ وجوہات کو مدنظر رکھتے ہوئے عدالت سائفر کیس کا ٹرائل اڈیالہ جیل میں کرنے کا حکم دیتی ہے۔ چونکہ چیئرمین پی ٹی آئی کا ٹرائل اڈیالہ جیل میں ہورہا ہے، شاہ محمود قریشی کا ٹرائل بھی اڈیالہ جیل میں ہی ہوگا۔ چیئرمین پی ٹی آئی کا جیل ٹرائل، اوپن ٹرائل ہوگا۔
ملزمان کے وکلا اور خاندان کے پانچ، 5 افراد کو ٹرائل کی کارروائی دیکھنے کی اجازت ہوگی۔ عام عوام اور سماعت سننے کے خواہشمد افراد کو ٹرائل کی کارروائی میں بیٹھنے کی اجازت ہوگی۔ عام عوام کو جیل رولز اور مینول اور کمرہ عدالت میں گنجائش کی بنیاد پر ٹرائل میں بیٹھنے کی اجازت ہوگی۔
