قومی احتساب بیورو (نیب) نے سابق وزیرِ اعلیٰ پنجاب چوہدری پرویز الہٰی سمیت دیگر ملزمان کیخلاف لاہور کی احتساب عدالت میں 1 ارب روپے سے زائد کا ریفرنس دائر کر دیا ہے، ریفرنس میں پرویز الہٰی اور ان کے صاحبزادے مونس الہٰی کو مرکزی ملزم نامزد کیا گیا ہے۔
نیب کی جانب سے دائر کردہ ریفرنس میں الزام عائد کیا گیا ہے کہ پرویز الہٰی، مونس الہٰی اور دیگر ملزمان غیر قانونی طریقے سے 116 ترقیاتی اسکیمیں منظور کرواکر قومی خزانے کو نقصان پہنچانے میں ملوث پائے گئے ہیں۔
نیب ریفرنس کے مطابق سابق وزیر اعلٰی پنجاب پرویز الہٰی اور سابق وفاقی وزیر مونس الہٰی نے من پسند ٹھیکے داروں کو کنٹریکٹ کے حصول میں کامیابی کےعوض مبینہ طور پر رشوت لی تھی، پرویز الہٰی نے 74 کروڑ 45 لاکھ روپے سے زائد رقم رشوت اور کک بیکس کی مد میں لی۔
نیب ریفرنس میں کہا گیا ہے کہ اکاؤنٹنٹ کک بیکس کی رقم مونس الہٰی اور ان کی فیملی کے اکاؤ نٹس میں جمع کراتا رہا، مونس الہٰی نے 10 لاکھ 61 ہزار یوروز اپنے غیر ملکی بینک اکاؤنٹ میں جمع کرائے۔
ریفرنس کے مطابق نیب حکام کی جانب سے کی گئی تفتیش میں ملزمان قصوروار پائے گئے، پرویز الہٰی کے فیملی ممبرز نے 304 ملین سے زائد رقم اپنے ذاتی اکاؤنٹس میں جمع کرائی، نیب نے اپنے ریفرنس میں احتساب عدالت سے ٹرائل کر کے ملزمان کو سزا دینے کی استدعا کی ہے۔
