پاکستان فلسطین کے دو ریاستی حل پر یقین رکھتا ہے، نگراں وزیراعظم انوارالحق کاکڑ

نگراں وزیراعظم پاکستان انوارالحق کاکڑ نے کہا ہے کہ غیرقانونی مقیم غیرملکیوں کے خلاف قانون کے مطابق کارروائی ہو گی، ہم مہاجرین کے حوالے سے اپنی ذمہ داریوں سے آگاہ ہیں مگر ہمارے ملک میں ایسے مہاجرین بھی قیام پذیر ہیں جن کے پاس کوئی شناختی دستاویزات نہیں ہیں۔

اسکائی نیوز العربیہ کو انٹرویو دیتے ہوئے انہوں نے کہاکہ پاکستان 50 سال سے افغان مہاجرین کی میزبانی کر رہا ہے۔

انوارالحق کاکڑ نے کہاکہ دنیا کو اس وقت موسمیاتی تبدیلی جیسے چیلنجز کا سامنا ہے، پاکستان کو موسمیاتی تبدیلیوں کی وجہ سے بہت نقصان اٹھانا پڑا۔

وزیراعظم نے کہاکہ کوپ 28 کے کامیاب انعقاد پر یو اے ای کی قیادت کو مبارکباد پیش کرتا ہوں، یو اے ای کی طرف سے اربوں ڈالر کے اعلان کی وجہ سے موسمیاتی تبدیلیوں کے چیلنج سے نمٹنے میں مدد ملے گی۔

ایک سوال کے جواب میں انہوں نے کہاکہ اسرائیل فلسطین میں شہریوں کا قتل عام کر رہا ہے جو قابل مذمت ہے، ہم مسئلہ فلسطین کے 2 ریاستی حل پر یقین رکھتے ہیں۔

بھارت کے ساتھ تعلقات کے حوالے سے پوچھے گئے سوال کے جواب میں انہوں نے کہاکہ یہ بہت پیچیدہ معاملہ ہے، کیونکہ ہم مسئلہ کشمیر کا اقوام متحدہ کی قراردادوں کے مطابق حل چاہتے ہیں۔ کیوں کہ کشمیری خود کہتے ہیں کہ کشمیر پاکستان کا اٹوٹ انگ ہے۔

انہوں نے کہاکہ بھارت مقبوضہ کشمیرمیں انسانی حقوق کی سنگین خلاف ورزیاں کر رہا ہے، مسئلہ کشمیر حل نہ ہوا تو خطے میں امن قائم نہیں ہو سکتا۔