پاکستان مسلم لیگ ن کے سینیئر رہنما خواجہ سعد رفیق نے کہا ہے کہ دانیال عزیز کو پارٹی سے کوئی شکایات ہیں تو ضرور علم میں لائیں لیکن ایسی باتیں ٹی وی اسکرین پر نہیں لانی چاہییں۔
لاہور میں میڈیا سے گفتگو کرتے ہوئے انہوں نے کہاکہ آج دن بھر امیدواروں کے انٹرویوز ہوتے رہے، پارٹی نے مجھے ڈویژن کے انچارج کی ذمہ داری سونپی ہے۔ آج مسلم لیگ ن کے پارلیمانی بورڈ نے لاہور کے 7 قومی اور 14 صوبائی اسمبلی کے حلقوں سے درخواستیں دینے والے امیدواروں کے انٹرویوز کیے۔
مزید پڑھیں
سعد رفیق نے کہاکہ خوشی کی بات ہے کہ پارٹی ٹکٹ کے لیے درخواستیں دینے والوں میں نوجوان اور وکلا بھی موجود ہیں، جن ساتھیوں نے لمبی جدوجہد کی ہے ان کی خدمات کو فراموش نہیں کیا جاسکتا۔
انہوں نے کہاکہ یہ انٹرویوز کل بھی جاری رہیں گے، حتمی فیصلہ پارلیمانی بورڈ کی جانب سے کیا جائے گا۔
سعد رفیق کا کہنا تھا کہ شہباز شریف سے ملاقات میں مسلم لیگ ن سندھ اور کراچی کے حوالے سے تبادلہ خیال کیا گیا ہے۔
دانیال عزیز سے متعلق بات کرتے ہوئے انہوں نے کہاکہ علاقائی سیاسی ایشو کو ٹی وی اسکرین پر نہیں لانا چاہیے۔ کسی بھی سیاسی جماعت میں اختلاف ہو سکتا ہے لیکن وہ آواز باہر نہیں جانی چاہیے۔
واضح رہے کہ ن لیگ کے رہنما دانیال عزیز نے گزشتہ اتحادی حکومت کے دوران مہنگائی کا ذمہ دار پارٹی سیکریٹری جنرل احسن اقبال کو قرار دیتے ہوئے کہا تھا کہ اگر پارٹی قیادت نے اس کا نوٹس نہ بھی لیا تو عوام تو ضرور نوٹس لے گی۔
