پنجاب کے شہر گوجرانوالہ میں ڈکیتی کی مختلف کارروائیوں کے دوران خواتین سے زیادتی کرنے والے 3 ملزمان کو گرفتار کرلیا گیا ہے۔
ترجمان پنجاب پولیس کے مطابق پنجاب کے نگران وزیراعلیٰ محسن نقوی کی جانب سے اس واقعے کا سخت نوٹس لیتے ہوئے پولیس کو حکم جاری کیا گیا کہ فوری طور پر اس واقعے میں ملوث تمام ملزمان کو گرفتار کیا جائے۔
گرفتار ملزمان میں عامر، ذیشان شانی اور ساجد شامل ہیں۔ پولیس کے مطابق عامر اور ذیشان شانی سگے بھائی ہیں۔ ملزمان بھائیوں کا تعلق منڈی بہاؤالدین جبکہ تیسرے ملزم ساجد کا تعلق فیصل آباد سے ہے۔
ترجمان پنجاب پولیس کے مطابق گرفتار ملزمان نے ڈکیتی کی 4 وارداتوں میں خواتین سے زیادتی کی تھی۔
گرفتاری پر نگران وزیراعلیٰ محسن نقوی نے بیان جاری کیا کہ ملزمان قرار واقعی سزا سے نہیں بچ پائیں گے۔ متاثرہ خواتین کو انصاف دلانے کے لیے ہر ممکن کوشش کی جائے گی۔
ڈکیتی اور زیادتی کے واقعات
گوجرانوالہ پولیس کے مطابق گزشتہ چند دنوں میں ڈکیتی کی 4 وارداتوں کے دوران خواتین سے زیادتی بھی کی گئی۔ 22 فروری کو ہونے والی اس واردات میں متاثرہ خاتون کو کھیت میں لے جاکر زیادتی کا نشانہ بنایا گیا۔
پولیس کے مطابق دوسری واردات میں 26 فروری کو ڈکیتی کے بعد ماں بیٹی سے زیادتی کی گئی۔ تیسری واردات میں 28 فروری کو بھی خاتون سے کھیت میں زیادتی کی گئی۔
ڈکیتی کی چوتھی واردات میں یکم مارچ کو بھی ایک لڑکی سے زیادتی کی گئی تھی۔ پولیس نے اپنے بیان میں اس بات کا اضافہ کیا گیا کہ یکم مارچ کو جس لڑکی کے ساتھ زیادتی ہوئی اسے 26 فروری کو بھی زیادتی کا نشانہ بنایا گیا تھا۔
