امریکا نے کہا ہے کہ پاکستان میں لیڈرز کے انتخاب میں اس کا کوئی کردار نہیں۔
ترجمان امریکی محکمہ خارجہ میتھیو ملر نے پریس بریفنگ کے دوران ایک سوال کے جواب میں کہا کہ امریکا پاکستان کی اس قیادت کے ساتھ بات چیت کرتا ہے جسے پاکستانی عوام منتخب کرتے ہیں۔
میتھیو ملر کا کہنا تھا کہ امریکا تمام معاملات پر حکومت پاکستان کے ساتھ اپنی بات چیت جاری رکھے گا۔
مزید پڑھیں
غیر قانونی افغان باشندوں کی وطن واپسی کے معاملے پر پاکستان اور افغانستان کے درمیان تعلقات میں ممکنہ کشیدگی سے متعلق سوال کے جواب میں میتھیو ملر کا کہنا تھا کہ امریکا ان دونوں ملکوں کے درمیان مختلف مسائل کے سفارتی حل کی حمایت کرتا ہے۔
انہوں نے کہا کہ امریکا سابق افغان ممبران پارلیمنٹ کو کرپشن پر نامزد کرنے کے لیے کارروائی کر رہا ہے، ان سابق ممبران اوران کے قریبی رشتہ داروں کو امریکا میں داخلے کے لیے نا اہل قرا ر دیا گیا ہے۔
