پاکستان مختلف مذاہب و عقائد کا گلدستہ ہے اور اقلیت کے ساتھ ہی ملک مکمل ہوتا ہے، نواز شریف

قائد پاکستان مسلم لیگ ن میاں محمد نواز شریف نے کہا ہے کہ اقلیتی برادری کے افراد نے ملک کی ترقی و حفاظت میں اپنا بھرپور کردار ادا کیا ہے۔

اقلیتی برادری سے تعلق رکھنے والے امیدواروں کے ناموں پر غور کے لئے منعقدہ مسلم لیگ (ن) کے پارلیمانی بورڈ کے اجلاس سے خطاب کر رہے ہیں۔ https://t.co/k2IZMBbSto

— PMLN (@pmln_org) December 21, 2023

پارٹی ٹکٹس کے اقلیتی امیدواروں سے خطاب کرتے ہوئے نواز شریف نے کہا کہ اقلیتی شہریوں نے بھی پاکستان کی ترقی میں بھرپور کردار ادا کیا ہے بلکہ فوج میں رہ کر بھی ملک کی حفاظت کی اور ان کی ایمانداری اور خلوص بھی لائق تحسین ہے۔
نواز شریف نے کہا کہ ہماری پارٹی میں آپ کی برادریوں کے ایسے بیشمار افراد ہیں جنہوں نے پارٹی کے لیے قربانیاں دیں اور اسے مضبوط بنانے میں اہم کرادار ادا کیا۔

نواز شریف نے کہا کہ اقلیت کے ساتھ مل کر ہی پاکستان مکمل ہوتا ہے اور ہمارا ملک مختلف مذاہب و عقائد کا ایک گلدستہ ہے جسے ہم آنے والے وقتوں میں مزید سجائیں گے اور خوبصورت بنائیں گے۔ انہوں نے مزید کہا کہ اقلیت پاکستان کا ایک قیمتی اثاثہ ہیں۔ قائد ن لیگ نے کہا کہ ’کرسمس کی بھی آمد آمد ہے میں دنیا بھر کے مسیحیوں افراد کو مبارکباد پیش کرتا ہوں‘۔
انہوں نے کہا کہ ’میرے لیے سب برابر ہیں ویسے بھی میں تو خود کو ایک ادنیٰ آدمی سمجھتا ہوں لیکن جو قومی لیڈر ہوتے ہیں وہ سب کو ایک ہی نظر سے دیکھتے ہیں‘۔