اسلام آباد کی مقامی عدالت نے پاکستان تحریک انصاف (پی ٹی آئی) کے بانی چیئرمین عمران خان کی 6 مقدمات جبکہ بشریٰ بی بی کی ایک مقدمے میں ضمانت قبل از گرفتاری میں 16 جنوری تک توسیع کردی ہے۔
ڈیوٹی جج احمد ارشد محمود نے سابق چیئرمین پی ٹی آئی کے خلاف درج 6 مقدمات اور بشری بی بی کی ایک مقدمے میں ضمانت کی درخواستوں پر سماعت کی۔
بشریٰ بی بی اپنے وکلا خالد یوسف چوہدری، عمیر نیازی اور عثمان گل کے ہمراہ عدالت کے روبرو پیش ہوئیں اور حاضری لگائی۔ استغاثہ کی جانب سے کوئی بھی پیش نہ ہوا۔ کیس کے تفتیشی افسر بھی غیر حاضر رہے۔
عدالت نے بشریٰ بی بی کی جعلی رسیدوں کے کیس میں ضمانت قبل از گرفتاری میں 16 جنوری تک توسیع کردی۔ عدالت نے بانی پی ٹی آئی کی 6 مقدمات میں بھی ضمانت قبل از گرفتاری میں 16 جنوری تک توسیع کرتے ہوئے سماعت ملتوی کردی۔
