پاکستان کے شعبہ تعلقات عامہ (آئی ایس پی آر) کے مطابق آج صبح ایران میں موجود دہشتگردوں کے ٹھکانوں پر حملہ کیا گیا، بی ایل اے اور بی ایل ایف کے ٹھکانوں کو نشانہ بنایا گیا، تمام دہشتگردوں کے ٹھکانوں پر مؤثر حملے کیے گئے۔
آئی ایس پی آر کے مطابق بلوچستان لبریشن آرمی اور بلوچستان لبریشن فرنٹ نامی دہشتگرد تنظیموں کے زیر استعمال ٹھکانوں کو انٹیلی جنس پر مبنی آپریشن میں کامیابی سے نشانہ بنایا گیا، ٹھکانے بدنام زمانہ دہشت گرد استعمال کر رہے تھے، دہشتگردوں میں دوست عرف چیئرمین، بجر عرف سوگھت، ساحل عرف شفق، اصغر عرف بشام اور وزیر عرف وزی شامل ہیں۔
مزید پڑھیں
آئی ایس پی آر نے بتایا کہ مسلح افواج پاکستانی شہریوں کی حفاظت کو یقینی بنانے کے لیے ہر وقت تیار ہیں، پاک فوج پرعزم ہے اور عوام کی حمایت سے پاکستان کے تمام دشمنوں کو شکست دینے کے لیے تیار ہے۔ یہ دہشت گرد پاکستان میں حالیہ حملوں کے ذمہ دار تھے۔ اسٹرائیک میں بے گناہ لوگوں کو محفوظ رکھنے کی بھرپور کوشش کی گئی۔
’مرگ بر سرمچار آپریشن میں بی ایل اے اور بی ایل ایف تنظیموں سے تعلق رکھنے والے دہشت گردوں کو انٹیلی جنس اطلاعات کی بنیاد پر کامیابی سے نشانہ بنایا گیا ، دہشت گردی کے یہ ٹھکانے بدنام زمانہ دہشت گرد دوستا المعروف چئیرمین کے تھے‘۔
پاک فوج کے مطابق پاکستان کی خود مختاری اور علاقائی سالمیت کا احترام اور کسی بھی مہم جوئی کے خلاف تحفظ کو یقینی بنانے کا ہمارا عزم غیر متزلزل ہے، لیکن دونوں ممالک دوطرفہ مسائل کے حل کے لیے مذاکرات اور تعاون کے ذریعے آگے بڑھیں گے۔
