پاکستان اور چین زراعت و آئی ٹی سمیت مختلف شعبوں میں تعاون بڑھانے کے لیے پرعزم

صدر مملکت ڈاکٹر عارف علوی سے عوامی جمہوریہ چین کے نائب وزیر خارجہ سن ویڈونگ نے ملاقات کی جس میں پاکستان اور چین کے باہمی فائدے کے لیے معیشت، انفارمیشن ٹیکنالوجی، زراعت اور انسانی وسائل کی ترقی کے شعبوں میں تعاون بڑھانے کی خواہش کا اعادہ کیا گیا۔

پاکستان کے دورے پر آئے ہوئے چینی نائب وزیر خارجہ نے وفد کے ہمراہ پیر کو یہاں ایوان صدر میں صدر مملکت سے ملاقات کی۔ اس موقع پر پاکستان میں چین کے سفیر جیانگ زیڈونگ بھی ملاقات میں موجود تھے۔

ایوان صدر کے پریس ونگ کے مطابق صدر مملکت نے وفد کا خیرمقدم کرتے ہوئے کہا کہ چین ایک بہت ہی عزیز دوست ہے جس نے ہمیشہ مشکل وقت میں پاکستان کا ساتھ دیا۔

انہوں نے اس بات پر روشنی ڈالی کہ سی پیک منصوبوں نے پاکستان کی توانائی کی ضروریات کو پورا کرنے اور اقتصادی ترقی میں بھی اہم کردار ادا کیا ہے۔

صدر مملکت نے کہا کہ پاکستان سی پیک کی اعلیٰ معیار کی ترقی کے لیے پوری طرح پرعزم ہے اور اس منصوبے کے اگلے مرحلے میں چین کا تعاون پاکستان کی صنعتی ترقی کے لیے اہم ہو گا۔ انہوں نے کہا کہ سی پیک منصوبہ دونوں دوست ممالک کے درمیان اقتصادی تعاون دوطرفہ تعلقات کو مزید مستحکم کرے گا۔

ڈاکٹر عارف علوی نے پاکستان کی معیشت کو مستحکم کرنے میں چین کے تعاون کو سراہا۔ انہوں نے کہا کہ پاکستان اپنی سماجی و اقتصادی ترقی کے لیے آئی ٹی، تعلیم، صحت، زراعت اور غربت کے خاتمے شعبوں میں چینی تجربات سے استفادہ کرنا چاہتا ہے۔