پاکستان مشہور اداکارہ اور میزبان مشی خان نے گلوکار راحت فتح علی خان کے اپنے ملازم پر وحشیانہ تشدد کے عمل پر شدید تنقید کرتے ہوئے انہیں اپنا علاج کرانے کا مشورہ دیا ہے۔ ان کا کہنا تھا کہ خدا کا خوف کریں میرے بھائی، اتنا جھوٹ نہ بولیں برائے مہربانی ہمیں بدہضمی ہوجاتی ہے۔
مزید پڑھیں
فوٹو اینڈ ویڈیو شیئرنگ ایپ انسٹاگرام پر مشی خان نے ایک ویڈیو شیئر کی جس میں انہوں نے راحت فتح علی خان کو شدید تنقید کا نشانہ بنایا ہے۔ اداکارہ نے کہا کہ راحت فتح علی خان صاحب آپ مشہورِ زمانہ گلوکار ہیں، آپ کے پاس ان گنت پیسہ ہے اور آپ کی بوتل مجھے لگ رہا ہے یہ کوئی ’شہد کی بوتل‘ ہے جس کے پیچھے آپ اپنے اسٹاف کو جانوروں کی طرح مار رہے ہیں۔
اداکارہ نے کہا کہ ‘آپ کو شرم نہیں آتی، آپ ایسی گھٹیا حرکتیں کرتے ہیں، آپ کے پاس اتنا پیسہ ہے آپ کی جو بھی شہد کی بوتل غائب ہوئی ہے اس کے بدلے میں آپ 10 کریٹ شہد کی بوتلوں کے خرید سکتے ہیں، آپ ایک بوتل کے لیے ایسا کر رہے ہیں، یہ دل ہے آپ کا، آپ کیسے کسی کی انسان کی مدد کرتے ہوں گے’۔
View this post on Instagram
انہوں نے مزید کہا کہ ‘اللہ نے آپ لوگوں کو اتنی عزت دی ہے وہ سنبھالی نہیں جا رہی، کوئی نہ کوئی چکر آپ کا سامنے آتا رہتا ہے اور اس ویڈیو کو دیکھ کر تو میں دنگ ہی رہ گئی ہوں، آپ اتنے ظالم ہیں، شرم آنی چاہیے آپ کو’۔
واضح رہے کہ گزشتہ روز سوشل میڈیا پر راحت فتح علی خان کی ایک ویڈیو وائرل ہوئی جس میں وہ اپنے ملازم کو بوتل گم ہو جانے پر بے دردی سے تشدد کا نشانہ بنا رہے ہیں۔ بعد ازاں راحت فتح علی خان کی جانب سے ایک بیان بھی جاری کیا گیا جس میں ان کا کہنا تھا یہ استاد شاگرد کا معاملہ ہے، دراصل پیر صاحب کے دم کیے ہوئے پانی کی بوتل کہیں رکھ کر بھول گیا تھا، تاہم راحت نے اس واقعے کے بعد ملازم سے معافی مانگ لی تھی۔
