چیف آف آرمی اسٹاف جنرل سیّد عاصم منیر نے کہا ہے کہ دوسری ریاست کی خود مختاری کا احترام ریاستی تعلقات میں سب سے اہم جز ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر سے ایرانی وزیر خارجہ حسین امیر عبداللہیان نے ملاقات کی ہے اور اس موقع پر یہ عزم کیا گیا ہے کہ کسی کو بھی پاک ایران تعلقات میں خلل نہیں ڈالنے دیں گے۔
آئی ایس پی آر کے مطابق پاکستان اور ایران کے تاریخی، مذہبی اور ثقافتی رشتوں کا ادراک کرتے ہوئے دونوں فریقوں نے دوطرفہ تعلقات کو مضبوط بنانے اور ایک دوسرے کے تحفظات کو سمجھنے پر زور دیا۔
مزید پڑھیں
آرمی چیف جنرل سیّد عاصم منیر نے دوسری ریاست کی خودمختاری اور علاقائی سالمیت کے احترام کی ضرورت پر زور دیا۔
آئی ایس پی آر نے بتایا کہ دونوں فریقوں نے مشاہدہ کیا کہ دہشت گردی مشترکہ خطرہ ہے جس سے باہمی تعاون، بہتر کوآرڈینیشن اور انٹیلی جنس شیئرنگ کے ذریعے نمٹنے کی ضرورت ہے۔
آرمی چیف نے سلامتی کے خدشات کو دور کرنے کے لیے پائیدار مصروفیت اور دستیاب مواصلاتی ذرائع کو استعمال کرنے کی ضرورت پر زور دیا۔
’دونوں فریقوں نے مشترکہ خطرات کے خلاف رابطہ کاری اور ردعمل بہتر بنانے کے لیے دونوں ملکوں میں فوجی رابطہ افسروں کی تعیناتی کے طریقہ کار کو جلد سے جلد فعال کرنے پر اتفاق کیا‘۔
دونوں فریقوں نے اس عزم کا اعادہ کیا کہ وہ قریبی رابطے میں رہیں گے اور برادر ممالک کے درمیان کسی کو بھی خلل ڈالنے کی اجازت نہیں دیں گے۔ پاکستان اور ایران برادر ملک اور پڑوسی ہیں، دونوں ممالک کی تقدیر ایک دوسرے سے جڑی ہوئی ہے۔
