’شادی کا کھانا کھا کھا کر تھکے نہیں؟‘، شادی کے سوال پر بابر اعظم نے کیا جواب دیا؟

قومی کرکٹ ٹیم کے اسٹار کھلاڑی اور سابق کپتان بابر اعظم اپنے بلے سے بڑے بڑے بولرز کو تو خوب جواب دیتے ہیں مگر جب ان کے فینز اور ساتھی کھلاڑی ان سے شادی کے متعلق سوال کرتے ہیں تو وہ کنی کترانے لگتے ہیں۔

بابر اعظم سے کیا گیا ایک ایسا ہی سوال ’ایکس‘ پر ’فرام دی پچ ٹو دی مائیک‘ پروگرام کے دوران سامنے آیا۔ پروگرام میں وکٹ کیپر بیٹر محمد رضوان بھی اچانک شامل ہوئے اور بطور فین بابر اعظم سے شادی سے متعلق سوال پوچھتے نظر آئے۔

محمد رضوان نے پروگرام میں شامل ہوتے ہی کہا کہ میرا بھی ایک سوال ہے کپتان سے، جس پر بابر اعظم نے حیرت کا اظہار کرتے ہوئے کہا، ’آپ کہاں سے آ گئے؟‘

The audio/video of Mohammad Rizwan's question to Babar Azam 😂😂#AskBabar #BPL2024 pic.twitter.com/rKTe4wOtzN

— Farid Khan (@_FaridKhan) February 1, 2024

محمد رضوان نے پھر بابر اعظم سے سوال کیا کہ آپ کی شادی کب ہے، جس پر بابر اعظم نے کہا، ’مجھے پتہ تھا کہ آپ نے مجھ سے یہی سوال کرنا ہے۔

محمد رضوان نے کہا کہ یہ سوال ہے اور آپ کو جواب دینا پڑے گا۔ بابر اعظم نے کہا کہ مجھ سے اکیلے میں ملیں، آپ کو جواب دے دوں گا میں۔

پروگرام کے میزبان نے اس موقع پر محمد رضوان سے مخاطب ہوئے کہ آپ نے بابر کو پریشان کر دیا ہے، جس پر محمد رضوان بولے کے یہاں سب ہی اچھے اچھے سوال کر رہے ہیں، میرے دل میں بھی ایک سوال تھا سو میں نے پوچھ لیا۔

پروگرام کے میزبان نے بتایا کہ کہ ایسا ہی ایک سوال بابر اعظم کی فین عروج جاوید نے ان سے پوچھا تھا کہ آپ دوستوں کی شادی کا کھانا کھا کھا کر تھکے نہیں۔

بابر اعظم نے بات کو کاٹتے ہوئے کہا، ’میں پچھلے کچھ دنوں سے صبح کو اٹھتا ہوں تو پتہ چلتا ہے میری شادی ہو رہی ہے اور مبارکباد دی جا رہی ہے اور شام کو واپس آتا ہوں تو تب بھی ایسا ہی ہو رہا ہوتا ہے، ایسا معلوم ہوتا ہے کہ لوگ میری شادی کر چکے ہیں اور اب وہ کہہ رہے ہیں کہ دوسری کی تیاری کریں۔‘

اس موقع پر رضوان بولے، ’مجھ سے زیادہ میری اہلیہ جاننا چاہتی ہیں اور ہر روز یہی پوچھتی ہیں کہ بابر اعظم کی شادی کب ہو رہی ہے، تو کپتان آپ تیاری پکڑیں‘۔ اس پر بابر اعظم بولے پہلے آپ کل کے میچ کی تیاری کریں۔