انٹرنیشنل کرکٹ کونسل (آئی سی سی) نے ون ڈے انٹرنیشنل رینکنگ جاری کردیں جس کے بعد بابر اعظم ایک بار پھر ٹاپ پوزیشن پر براجمان ہوگئے، جبکہ پہلے نمبر پر موجود بھارتی کھلاڑی شبمن گل ایک درجہ تنزلی کے بعد دوسرے نمبر پر آگئے۔
آئی سی سی کی جانب سے جاری کردہ تازہ ترین اپ ڈیٹ جاری ہونے کے بعد پاکستان کے اسٹار بلے باز بابر اعظم نے ایک بار پھر آئی سی سی ون ڈے رینکنگ میں ٹاپ پوزیشن حاصل کر لی ہے۔ آئی سی سی کے مطابق سابق پاکستانی کپتان کے 824 ریٹنگ پوائنٹس ہیں۔
مزید پڑھیں
بھارت کے شبمن گل 810 ریٹنگ پوائنٹس کی بنا پر ایک درجہ تنزلی کے بعد دوسرے نمبر پر موجود ہیں، جبکہ بھارتی بلے باز ویرات کوہلی 775 ریٹنگ پوائنٹس کے بعد تیسری پوزیشن پر براجمان ہیں۔
واضح رہے بابر اعظم اس سے قبل تقریباً 3 سال تک نمبر 1 پوزیشن پر براجمان رہ چکے ہیں، بھارتی کھلاڑی شبمن گل نے رواں سال ان سے پوزیشن چھین لی تھی، لیکن بابر اعظم کی دوبارہ نمبر ون پوزیشن پر واپسی ان کی جارحانہ بلے بازی کی ایک بہترین مثال ہے۔
29 سالہ بلے باز بابر اعظم نے ون ڈے میں مسلسل اپنی صلاحیتوں کا لوہا منوایا ہے، انہوں نے 117 میچوں میں 56.72 کی شاندار اوسط سے 5 ہزار 729 رنز کا شاندار ریکارڈ قائم کیا۔ مزید برآں، انہوں نے اپنی اعلیٰ معیار کی بیٹنگ کی مہارت کا مظاہرہ کرتے ہوئے 19 سنچریاں بنائی ہیں۔
یاد رہے کہ بابر اعظم نے حال ہی میں ورلڈ کپ 2023 میں مایوس کن کارکردگی کے بعد پاکستان کرکٹ کے تمام فارمیٹس میں کپتانی چھوڑنے کا فیصلہ کیا تھا۔
