چوہا بلی سے کھیل گیا

سوشل میڈیا پر ایک ویڈیو خاصی وائرل ہوئی جس میں دیکھا جا سکتا ہے کہ ایک چوہا غیر معمولی انداز میں اپنا پیچھا کرتی بلی سے خود کو بچانے کی کوشش کر رہا ہے۔

جب چوہے کو لگا کہ جان بچنی مشکل ہے تو اس نے ایک انوکھا طریقہ اپنایا جس سے وہ بلی کو جھانسا دینے میں کامیاب ہوگیا اور وہ منظر دیکھنے والوں کی بھی ہنسی چھوٹ گئی۔ یہ کلپ دیکھنے والوں کو مشہور کارٹون شو ٹام اینڈ جیری کی بھی یاد دلا گیا۔

ویڈیو میں ایک بلی کو بند دروازے کے سامنے کھڑا دکھایا گیا ہے۔ کچھ ہی لمحوں میں دروازہ کے نیچے سے ایک چوہا باہر آتا ہے جس پر بلی اس کا پیچھا کرنے لگتی ہے تاہم چوہا جلد ہی بلی کو چکما دینے میں کامیاب ہو جاتا ہے۔ وہ چوہا پناہ تو بلی کی ٹانگوں کے نیچے ہی لیتا ہے لیکن اپنے صیاد کو دکھائی نہیں دے رہا ہوتا۔ یہاں یہ بھی اندازہ ہو رہا تھا کہ بلی یہ توقع ہی نہیں کر رہی تھی کہ اس کا شکار اس کے قدموں کے نیچے ہی موجود ہے۔

لوگوں کو ہنسانے کا باعث بننے والے کلپ کو سوشل میڈیا پر پوسٹ ہونے کے بعد سے اب تک 11000 سے زائد لوگ پسند کر چکے ہیں جبکہ اس پر تبصرے بھی خوب ہوئے ہیں۔