پاکستان کی نگراں حکومت نے اسرائیل افواج کے ہاتھوں تباہ حال غزہ کی پٹی کے عوام کے لیے امدادی سامان کی فراہمی کی پانچویں کھیپ الخدمت فاؤنڈیشن کے تعاون سے روانہ کر دی ہے۔
نیشنل ڈیزآسٹر منیجمنٹ اتھارٹی( این ڈی ایم اے ) نے الخدمت فاؤنڈیشن کے تعاون سے امدادی سامان پاکستان ائیر فورس کے C-130 طیارے کے ذریعے نور خان ائیر بیس سے روانہ کیا۔
مزید پڑھیں
نیشنل ڈیزاسڑ مینجمنٹ اتھارٹی (این ڈی ایم اے)کی جانب سے اتوار کو جاری اعلامیہ کے مطابق سامان روانگی کی تقریب میں این ڈی ایم اے، مسلح افواج، وزارتِ خارجہ کے افسران اور الخدمت فاؤنڈیشن کے نمائندگان نور خان ائیر بیس پر موجود تھے۔
یہ امداد ی سامان العرش مصر پہنچے گا جہاں مصر میں تعینات پاکستانی سفیر فلسطینی عوام میں تقسیم کے لیے سامان وصول کریں گے۔
امداد ی سامان میں موسم سرما کے لیے گرم خیمے، ترپال اور کمبل شامل ہیں۔ علاوہ ازیں این ڈی ایم اے کی جانب سے ایک اور امدادی پرواز کراچی سے 100 ٹن سامان لیکر 6 فروری کو مصر روانہ ہوگی۔
پاکستان کی جانب سے ابھی تک غزہ کے لیے 5 پروازوں کے ذریعے تقریباً230 ٹن امدادی سامان روانہ کیا جا چکا ہے۔ پاکستان مشکل کی گھڑی میں فلسطینی بہن بھائیوں کے ساتھ کھڑا ہے اور ان کی حمایت و امداد کا سلسلہ جاری رکھے گا۔
