پاکستان تحریک انصاف نے ملک میں عام انتخابات میں ہونے والی مبینہ دھاندلی کے معاملے پر سپریم کورٹ سے مداخلت کرنے کا مطالبہ کیا ہے۔
پاکستان تحریک انصاف کے ترجمان کی جانب سے جاری ایک بیان کے مطابق، انتخابی عمل مکمل ہونے کے 4 روز بعد بھی نتائج میں غیرقانونی ردوبدل کی مکروہ کوششیں پاکستان کو عدم استحکام کی دلدل میں دھکیلنے اور معیشت کو موت کے گھاٹ اتارنے کا منصوبہ ہے۔
بیان میں کہا گیا ہے کہ آزادانہ، منصفانہ اور شفاف انتخابات ملک کو بحرانوں سے نکالنے کا ناگزیر جمہوری اور دستوری رستہ تھا جسے الیکشن کمیشن اپنی مجرمانہ نااہلی اور مکروہ ایجنڈے کی بھینٹ چڑھا رہا ہے۔
Related Posts
ترجمان پی ٹی آئی کا کہنا ہے کہ عوام کی جانب سے واضح فیصلے کے بعد نہایت کمپرومائزڈ ریٹرننگ افسران کے ذریعے اکثریت کو زبردستی اقلیّت میں بدل کر جمہوریت کا قتل کیا جارہا ہے اور پورے انتخابی عمل کی ساکھ اور حیثیت خاک میں ملائی جارہی ہے۔
انہوں نے کہا کہ الیکشن کمیشن کی جانبداری اور انتخابی عمل میں اس کی مجرمانہ مداخلت کے باعث پوری دنیا انتخابات کو سنگین شکوک و شبہات کی نگاہ سے دیکھ رہی ہے، سپریم کورٹ انتظامی افسران کی بطور ریٹرننگ افسران تعیناتی سمیت الیکشن کمیشن کے حقیقی عزائم کے حوالے سے تحریک انصاف کے خدشات اور تحفظات کو سنجیدگی سے لیتی تو کمیشن کو عوامی مینڈیٹ کے کھلواڑ کی جرات نہ ہوتی۔
ترجمان نے کہا کہ عوام کے معاشی حالات اور ملکی معیشت عوام کی منتخب اکثریت کے بجائے ٹاؤٹوں اور بنارسی ٹھگوں کے مابین اقتدار کی بندر بانٹ کے ہرگز متحمّل نہیں ہوسکتے لہٰذا عدالت عظمیٰ مداخلت کرکے عوامی مینڈیٹ کو بلڈوز اور عوام کے مسترد شدہ اقلیّتی گروہ کو ملک پر مسلط کرنے کے مذموم منصوبے کی راہ روکے۔
