پاکستان مسلم لیگ ن کے قائد نواز شریف نے صدر پاکستان مسلم لیگ ن شہباز شریف کو وزیراعظم اور مریم نواز کو وزیراعلیٰ پنجاب نامزد کر دیا ہے۔
مسلم لیگ ن کی ترجمان مریم اورنگزیب نے سماجی رابطے کی سائٹ ’ایکس‘ پر اپنے بیان میں کہا ہے کہ نواز شریف نے شہباز شریف کو وزیراعظم جبکہ مریم نواز کو وزیراعلیٰ پنجاب نامزد کیا ہے۔
پاکستان مسلم لیگ (ن) کے قائد جناب محمد نوازشریف نے وزیراعظم اسلامی جمہوریہ پاکستان کے عہدے کےلئے جناب محمد شہبازشریف کو نامزد کر دیا ہے جبکہ وزیراعلی پنجاب کے عہدے کےلئے محترمہ مریم نوازشریف کو نامزد کیا ہے۔ جناب محمد نوازشریف نے پاکستان کے عوام اور سیاسی تعاون فراہم کرنے والی…
— Marriyum Aurangzeb (@Marriyum_A) February 13, 2024
انہوں نے کہاکہ نوازشریف نے پاکستان کے عوام اور سیاسی تعاون فراہم کرنے والی تمام سیاسی جماعتوں اوران کے قائدین کا شکریہ ادا کرتے ہوئے اپنے اس پختہ یقین کا اظہار کیا ہے کہ ان فیصلوں کے نتیجے میں پاکستان معاشی خطرات اور عوام مہنگائی سے نجات پائیں گے۔
قبل ازیں چوہدری شجاعت کی رہائشگاہ پر میٹنگ کے بعد سیاسی رہنماؤں کے ہمراہ پریس کانفرنس کرتے ہوئے شہباز شریف نے کہا تھا کہ مسلم لیگ ن نے وزیراعلیٰ پنجاب کے لیے مریم نواز کو نامزد کیا ہے جبکہ ہمارے وزیراعظم کے امیدوار نواز شریف ہی ہوں گے، ان سے درخواست کریں گے کہ عہدہ قبول کریں۔
مزید پڑھیں
یاد رہے کہ پاکستان مسلم لیگ ن، پاکستان پیپلزپارٹی، ایم کیو ایم، مسلم لیگ ق، استحکام پاکستان پارٹی اور بلوچستان عوامی پارٹی نے مل کر حکومت بنانے کا فیصلہ کیا ہے۔
قوی امکان ہے کہ جمعیت علما اسلام (ف) بھی حکومت کا حصہ ہوگی تاہم آج چوہدری شجاعت کی رہائشگاہ پر ہونے والے اجلاس میں ان کی نمائندگی موجود نہیں تھی۔
آج بلاول بھٹو نے اپنی پریس کانفرنس میں کہاکہ ہم وزارت عظمیٰ کے لیے مسلم لیگ ن کے امیدوار کو ووٹ دیں گے تاہم وزارتیں نہیں لیں گے۔
ان کا یہ بھی کہنا تھا کہ میری خواہش ہے صدر مملکت کے امیدوار آصف علی زرداری ہوں۔
