چیف آرگنائزر اور نائب صدر مسلم لیگ ن مریم نواز کہتی ہیں کہ وزارت عظمیٰ کا عہدہ قبول نہ کرنے کا مطلب اگر یہ اخذ کیا جا رہا ہے کہ نواز شریف سیاست سے کنارہ کش ہو رہے ہیں تو اس میں کوئی سچائی نہیں ہے۔ نواز شریف اگلے 5 سال نہ صرف بھرپور سیاست کریں گے بلکہ وفاق و پنجاب میں اپنی حکومتوں کی سرپرستی بھی کریں گے۔
چیف آرگنائزر مسلم لیگ ن مریم نواز نے ایکس پر پوسٹ کرتے ہوئے لکھا کہ نوازشریف کی تینوں حکومتوں میں عوام نے واضح اکثریت دی تھی اور یہ بات وہ انتخابی تقاریر میں واضح کر چکے ہیں کہ وہ کسی مخلوط حکومت کا حصہ نہیں بنیں گے۔
مزید پڑھیں
مریم نواز نے لکھا کہ جو لوگ نواز شریف کے مزاج سے واقف ہیں انہیں نواز شریف کے اصولی موقف کا پتہ ہے۔ شہباز شریف اور میں ان کے سپاہی ہیں، اور ان کے حکم کے پابند ہیں۔
انہوں نے مزید لکھا کہ نواز شریف کی سربراہی اور نگرانی میں کام کریں گے، عوام کی خدمت کرنا ہی ہمارا مقصد ہے، اللّہ ہمیں اس مقصد میں کامیابی عطا فرمائے۔
واضح رہے گزشتہ روز مسلم لیگ ن، پیپلز پارٹی اور ایم کیو ایم نے حکومت سازی میں مل کر حکومت بنانے کا فیصلہ کیا ہے، تاہم اتحادی جماعتوں نے مسلم لیگ ن کے ساتھ حکومت سازی میں مکمل تعاون فراہم کرنے کا اعلان کیا۔
ترجمان مسلم لیگ کی جانب سے ایک بیان بھی جاری کیا گیا تھا کہ نوازشریف نے پاکستان کے عوام اور سیاسی تعاون فراہم کرنے والی تمام سیاسی جماعتوں اوران کے قائدین کا شکریہ ادا کرتے ہوئے اپنے اس پختہ یقین کا اظہار کیا ہے کہ ان فیصلوں کے نتیجے میں پاکستان معاشی خطرات اور عوام مہنگائی سے نجات پائیں گے۔
