پاکستان تحریک انصاف اور جماعت اسلامی کی قیادت کے درمیان ملاقات ہوئی ہے، جس میں عام انتخابات کے بعد ملک میں پیدا شدہ صورت حال پر تبادلہ خیال کیا گیا ہے۔
دونوں جماعتوں کے رہنماؤں نے رابطے جاری رکھنے پر اتفاق کیا ہے۔
اسلام آباد میں تحریک انصاف اور جماعت اسلامی کے رہنماوں کی ملاقات شروع
تحریک انصاف کے وفد میں اسد قیصر، شوکت یوسفزئی، بیرسٹر سیف، صبغت اللہ اور دیگر شامل، جبکہ جماعت اسلامی کے وفد میں نائب امیر جماعت اسلامی لیاقت بلوچ ، میاں اسلم اور عنایت اللہ خان شامل@JIPOfficial pic.twitter.com/OByd5t27xz
— Qaisar Sharif (@Qaisarsharif555) February 16, 2024
ملاقات کے بعد پاکستان تحریک انصاف کے مرکزی رہنما اسد قیصر اور جماعت اسلامی کے نائب امیر لیاقت بلوچ نے میڈیا سے گفتگو کی ہے۔
پاکستان تحریک انصاف کے وفد کی قیادت اسد قیصر نے کی جبکہ ملاقات کے دوران جماعت اسلامی کی طرف سے لیاقت بلوچ و دیگر موجود تھے۔
اب فیصلے بند کمروں میں نہیں میدان میں ہوں گے، اسد قیصر
اسد قیصر نے میڈیا سے گفتگو کرتے ہوئے کہاکہ ہم 170 سے زیادہ نشستوں پر جیتے ہوئے تھے مگر ہمارا مینڈیٹ چوری کیا گیا، اب فیصلے بند کمروں نہیں میدان میں ہوں گے۔
مزید پڑھیں
انہوں نے کہاکہ پیر کو ہماری میٹنگ ہو رہی ہے جس میں آئندہ کا لائحہ عمل طے کریں گے۔ بدقسمتی سے ملک مزید سیاسی عدم استحکام کی طرف بڑھ رہا ہے۔
اسد قیصد نے کہاکہ الیکشن میں دھاندلی کے خلاف کل ملک بھر میں احتجاج کی کال دی ہے، عوام بھرپور شرکت کریں۔
ہم پہلے سے دھاندلی زدہ الیکشن کو مسترد کر چکے ہیں، لیاقت بلوچ
اس موقع پر جماعت اسلامی کے نائب امیر لیاقت بلوچ نے کہاکہ دونوں جماعتوں کے آپس میں رابطے جاری رہیں گے۔ کل جماعت اسلامی کی شوریٰ اور مجلس عاملہ کا اجلاس ہے جس میں معاملات زیر غور آئیں گے۔
انہوں نے کہاکہ ہم نے پہلے ہی دھاندلی زدہ الیکشن کو مسترد کرتے ہوئے چیف الیکشن کمشنر سے استعفے کا مطالبہ کر رکھا ہے۔
انہوں نے کہاکہ پاکستان میں سیاسی و معاشی استحکام غیرجانبدارانہ انتخابات کے ذریعے ہی ممکن ہے، ہم ملک کو کسی بھی ماورا آئین اقدام سے بچائیں گے۔
واضح رہے کہ اس سے قبل پی ٹی آئی نے جماعت اسلامی سے مل کر خیبرپختونخوا میں حکومت بنانے کا اعلان کیا تھا، جس کے ردعمل میں جماعت اسلامی خیبرپختونخوا کے امیر پروفیسر ابراہیم نے اس کی تردید کرتے ہوئے کہا تھا کہ ہمارا پی ٹی آئی سے کوئی اتحاد نہیں ہوا۔
