جماعت اسلامی پاکستان خیبرپختونخوا کے امیر رہنما پروفیسر محمد ابراہیم نے پی ٹی آئی کے ساتھ اتحاد کی تردید کردی۔
اپنے ایک بیان میں انہوں نے کہاکہ پی ٹی آئی جس کے ساتھ بھی حکومت بنانا چاہے ان کو اختیار ہے۔ جماعت اسلامی کا نام استعمال کرنے کا اخلاقاً کوئی جواز نہیں بنتا۔
انہوں نے کہاکہ جماعت اسلامی نے ابھی کوئی فیصلہ نہیں کیا، پی ٹی آئی خود سے ہی حکومت بنانے کے لیے جماعت اسلامی کا نام استعمال کررہی ہے۔
مزید پڑھیں
پروفیسر ابراہیم کا کہنا تھا کہ یہ طرزِ عمل نامناسب اور غیر اخلاقی ہے۔ جماعت اسلامی کسی کو کندھا فراہم نہیں کرے گی۔
انہوں نے کہا کہ پی ٹی آئی کو اخلاقی اقدار ملحوظ خاطر رکھنی چاہییں، جماعت اسلامی کا اس طرح حکومت سازی کے لیے نام لینا اخلاقاً مناسب نہیں۔
واضح رہے کہ اس سے قبل پاکستان تحریک انصاف کے ترجمان رؤف حسن نے پریس کانفرنس کرتے ہوئے کہا تھا کہ عمران خان نے وفاق اور پنجاب مجلس وحدت المسلمین جبکہ خیبرپختونخوا میں جماعت اسلامی کے ساتھ اتحاد کی منظوری دیدی ہے۔
دوسری جانب پاکستان تحریک انصاف اور جماعت اسلامی کی لوکل قیادت کی جانب سے بھی کچھ ایسے بیانات سامنے آئے تھے جس میں اتحاد کا تاثر دینے کی بات کی گئی تھی۔
