چیف جسٹس کے خلاف سوشل میڈیا پر دھمکی آمیز مہم چلانے والا شخص گرفتار

چیف جسٹس آف پاکستان قاضی فائز عیسیٰ کو سوشل میڈیا پر دھمکیاں دینے والے شخص کو گرفتار کر لیا گیا ہے۔ ذرائع کے مطابق گرفتار شخص جو راولپنڈی کا رہائشی ہے نے سوشل میڈیا پر چیف جسٹس کے خلاف مہم چلائی تھی۔

ذرائع کے مطابق راولپنڈی کے رہائشی، عبد الواسع نے 20 فروری کو چیف جسٹس کے خلاف غلیظ اور دھمکی آمیز سوشل میڈیا مہم میں حصہ لیا، عبدالواسع نے سوشل میڈیا اکاؤنٹ ایکس پر مہم چلاتے ہوئے چیف جسٹس کو دھمکیاں دیں اور کردار کشی کی۔

ذرائع نے بتایا کہ قانون نافذ کرنے والے اداروں نے فوری کارروائی کرتے ہوئے عبدالواسع کو حراست میں لے لیا، اور چیف جسٹس کے خلاف سوشل میڈیا مہم میں باقی کرداروں کی گرفتاری کے لیے بھی پیش رفت جاری ہے، ملزمان کی شناخت کا عمل بھی جاری ہے۔

ذرائع کا مزید کہنا ہے کہ باقی ملوث افراد کی نشان دہی کے بعد ایسے تمام لوگ جو اس مذموم سوشل میڈیا مہم کا حصہ رہے ہیں، ان کے خلاف سخت قانونی کارروائی عمل میں لائی جا رہی ہے۔

واضح رہے 17 فروری کو کمشنر راولپنڈی کی جانب سے راولپنڈی ڈویژن میں مبینہ دھاندلی کا اعتراف کیا گیا، اور ساتھ ہی چیف الیکشن کمیشن اور چیف جسٹس قاضی فائز عیسیٰ کو بھی اس میں شامل قرار دیا گیا۔ جس پر سوشل میڈیا صارفین نے الیکشن کمیشن اور چیف جسٹس کو تنقید کا نشانہ بنانا شروع کر دیا۔