امریکا کی بیٹری ساز کمپنی انرجائزر نے طاقتور ترین بیٹری کے حامل فون کو متعارف کرادیا، جس کی بیٹری لگ بھگ 3 ماہ تک چلے گی۔ فون اکتوبر 2024 تک فروخت کے لیے پیش کیا جائے گا، اس کی ابتدائی قیمت 74 ہزار روپے تک رکھے جانے کا امکان ہے۔
ٹیکنالوجی ویب سائٹ زی ڈی نیٹ کے مطابق انرجائزر نے ورلڈ موبائل کانفرنس میں اینڈرائیڈ فون متعارف کراتے ہوئے بتایا کہ طاقتور ترین بیٹری کا حامل فون رواں برس کے اختتام تک عام فروخت کے لیے پیش کیا جائے گا۔
مزید پڑھیں
انرجائزر کمپنی بیٹریز اور پاور بینک بناتی ہے اور اب کمپنی نے 28 ہزار ایم اے ایچ کے پاور بینک کو اسمارٹ فون میں تبدیل کردیا ہے۔ کمپنی نے بتایا ہے کہ وہ ہارڈ کیس پی 28 کے نامی فون متعارف کرائے گی۔ مذکورہ فون کو 87-6 انچ اسکرین، 8 جی بی ریم اور 256 جی بی میموری کے ساتھ پیش کیا جائے گا۔
فون 3 بیک کیمروں کا حامل ہوگا، جس میں سے مین کیمرا 64 میگا پکسل، دوسرا 20 اور تیسرا 2 میگا پکسل ہوگا۔ ہارڈ کیس پی 28 کے میں 16 میگا پکسل سیلفی کیمرا بھی دیا جائے گا، ساتھ ہی کمپنی نے دعویٰ کیا کہ فرنٹ کیمرے کو خصوصی طور پر ویڈیو کالز کے دوران بہتر کوالٹی کی ٹیکنالوجی سے اپ گریڈ کیا گیا ہے۔
فون کا وزن بھی عام فونز کے مقابلے میں 4 گنا زیادہ یعنی نصف کلو سے زیادہ ہوگا۔ فون میں فنگر پرنٹ سینسر سمیت دیگر سیکیورٹی فیچرز بھی دیے جائیں گے جب کہ اسے ایںڈرائیڈ کے آپریٹنگ سسٹم میں پیش کیا جائے گا۔
کمپنی کے مطابق ہارڈ کیس پی 28 کے میں 28 ہزار ایم اے ایچ کی بیٹری کو 36 واٹ کے چارجر کے ساتھ پیش کیا جائے گا اور فون کی بیٹری محض ڈیڑھ گھنٹے میں 100 فیصد فل ہو جائے گی۔ کمپنی کے مطابق فون کا استعمال کم رکھا جائے گا تو بیٹری 94 دن تک چلائی جا سکے گی اور اگر مسلسل 24 گھنٹے فون کالز کی جائیں تو بیٹری 5 دن تک چلے گی۔
