جماعت اسلامی پاکستان کے امیر سراج الحق نے کہا ہے کہ 2 خاندان 50 سال سے ملک کو لوٹ رہے ہیں، ان کے ہوتے ہوئے کچھ بھی محفوظ نہیں، مگر یہ ان کی آخری حکومت ہوگی۔
جماعت اسلامی کے زیراہتمام اسلام آباد میں غزہ مارچ کا انعقاد کیا گیا، جس میں امیر جماعت اسلامی سراج الحق، سینیٹر مشتاق احمد اور دیگر نے شرکت کی۔
مزید پڑھیں
غزہ مارچ کے شرکا سے خطاب کرتے ہوئے سراج الحق نے کہاکہ پاکستان کے عوام اہل غزہ کے ساتھ کھڑے ہیں، مگر حکمرانوں نے فلسطین کے عوام کا ساتھ نہیں دیا۔
انہوں نے کہاکہ خیال تھا نواز شریف اور شہباز شریف غزہ کو تباہی سے بچانے کے لیے عملی اقدامات کریں گے، مگر اسمبلی میں اہل غزہ کے لیے کوئی لائحہ عمل پیش نہیں کیا جاتا۔
سراج الحق نے کہاکہ ہم پاکستان کو فلاحی ریاست بنانے کے لیے اپنی جدوجہد جاری رکھیں گے، جب تک 2 خاندان ملک پر قابض ہیں ہماری معیشت ٹھیک نہیں ہو سکتی۔ ’ان کے ہوتے ہوئے جغرافیہ، تہذیب و تمدن اور خزانہ بھی محفوظ نہیں‘۔
انہوں نے کہاکہ یہ 2 خاندان پیسا جمع کرکے اس کی بنیاد پر سیاست کرتے ہیں۔
سراج الحق نے نے کہاکہ پاکستان کے عوام نے اہل غزہ کو پیغام دیا ہے کہ وہ ان کے ساتھ ہیں، ہم جمعۃ الوداع کے موقع پر ملک بھر سے امریکی سفارتخانے کی جانب ملین مارچ کریں گے۔
سراج الحق کا کہنا تھا کہ ہماری پارلیمنٹ میں بے جان قراردادیں پاس کی جاتی ہیں، جبکہ او آئی سی صرف بیانات کی حد تک محدود ہے۔
سراج الحق نے کہاکہ امریکا، برطانیہ اور فرانس نے اسرائیل کا ساتھ دیا مگر ہمارے حکمرانوں نے فلسطینیوں کا ساتھ نہیں دیا۔
