جسٹس نعیم اختر افغان نے سپریم کورٹ کے جج کی حیثیت سے حلف اٹھالیا

جسٹس نعیم اختر افغان نے سپریم کورٹ کے جج کے عہدے کا حلف اٹھالیا ہے۔

تفصیلات کے مطابق، جسٹس نعیم اختر افغان کی حلف برداری کی تقریب سپریم کورٹ میں ہوٸی، چیف جسٹس قاضی فائز عیسیٰ نے جسٹس نعیم اختر افغان سے عہدے کا حلف لیا۔

سپریم کورٹ کے ججز، سینیئر وکلا اور عدالتی اسٹاف نے جسٹس نعیم اختر افغان کی حلف برداری کی تقریب میں شرکت کی۔

جسٹس نعیم اختر افغان بلوچستان ہائی کورٹ کے چیف جسٹس کے طور پر فرائض سر انجام دے چکے ہیں۔ سپریم کورٹ میں ان کی تعیناتی کے بعد سپریم کورٹ میں ججز کی تعداد 14 ہوگئی ہے۔

واضح رہے کہ وزارت قانون و انصاف نے گزشتہ ہفتے بذریعہ نوٹیفیکیشن جسٹس نعیم اختر افغان کو سپریم کورٹ کا جج تعینات کیا تھا۔ علاوہ ازیں، وزارت قانون و انصاف نے جسٹس محمد ہاشم خان کاکڑ کو قائم مقام چیف جسٹس بلوچستان ہائیکورٹ جب کہ جسٹس ملک شہزاد احمد کو لاہور ہائی کورٹ کا چیف جسٹس تعینات کیا تھا۔