عام طور پر لوگ یہ خیال کرتے ہیں کہ بینکوں میں ان کا سرمایہ محفوظ ہے، اور اسی بنیاد پر زندگی بھر کی جمع پونجی بینکوں میں محفوظ رکھی جاتی ہے۔
موجودہ دور میں جہاں ڈیجیٹیل فراڈ عام ہو چکا ہے اور بینکوں میں پڑی لوگوں کی رقم بھی ہتھیا لی جاتی ہے، وہیں آج ایک عجیب و غریب واقعہ اور سامنے آ گیا۔
کراچی کی ایک نیشنل بینک برانچ کو مس پرنٹ کرنسی نوٹ جاری کر دیے گئے، صارفین کی نشاندہی پر معاملہ سامنے آیا تو ہلچل مچ گئی۔
مزید پڑھیں
یہ معاملہ کراچی کے ایک نیشنل بینک میں سامنے آیا جہاں پر عملہ صارفین کو مس پرنٹ تھماتا رہا، جب ایک صارف نے نشاندہی کی تو حقیقت آشکار ہوئی اور عملے کو بھی اپنی غلطی کا احساس ہوا۔
جس بینک میں مس پرنٹ کرنسی نوٹ پہنچائے گئے اس کے مینیجر کا کہنا ہے کہ آج صبح جو کیش آیا، اس میں نوٹوں ایک سائیڈ پر پرنٹ ہے جبکہ دوسری سائیڈ بالکل سفید ہے۔
انہوں نے بتایا کہ ہمیں یہ بھی نہیں معلوم کے غلطی سے اب تک کتنے صارفین کو یہ نوٹ دیے جا چکے ہیں۔
صارف کی نشاندہی پر ہمیں حقیقت کا پتا چلا، بینک مینیجر
بینک مینیجر نے مزید بتایا کہ صارف کی جانب سے نشاندہی پر جب کیش چیک کی گئی تو ہمیں معلوم ہوا ہے کہ نوٹوں کی ایک سائیڈ ٹھیک جبکہ دوسری مس پرنٹ ہے۔ اس شکایت پر جب مزید بنڈل چیک کیے گئے تو وہ بھی ایسے ہی تھے۔
معاملہ آپریشن ڈیپارٹمنٹ کو بھیج دیا ہے، ترجمان نیشنل بینک
دوسری جانب ترجمان نیشنل بینک نے اپنا موقف دیتے ہوئے کہا ہے کہ بینک برانچ سے ویڈیو ہماری پاس پہنچی ہے، اب ہم نے بینک مینیجر کے بیان کی بنیاد پر معاملہ آپریشن ڈیپارٹمنٹ کو بھیج دیا ہے۔
انہوں نے کہاکہ تحقیقات کے بعد جب مزید تفصیلات سامنے آئیں گی تو حقائق سامنے لائے جائیں گے۔
