پاکستان مسلم لیگ ن کی سینیئر رہنما عظمیٰ بخاری نے وزیر اعلیٰ پنجاب مریم نواز شریف کی گاڑی کے ٹائروں کی تبدیلی پر شور مچانے والوں کو جاہل قرار دے دیا۔
وی نیوز سے گفتگو کرتے ہوئے عظمیٰ بخاری نے کہا کہ جاہلوں کو اس بات کا علم ہی نہیں ہے کہ سیکیورٹی بنیادوں پر وزیر اعلیٰ کویہی آرمڈ مرسڈیز کا استعمال کرنا پڑتا ہے اور یہ ایک انتہائی وزنی گاڑی ہوتی ہے، جس کے ٹائر 10 ہزار کلو میٹر چلنے کے بعد تبدیل کیے جانے ضروری ہوتے ہیں۔
مزید پڑھیں
عظمیٰ بخاری نے کہاکہ شور مچانے والوں نے خود اپنے دور حکومت میں 3کروڑ سے زیادہ کی لاگت سے اسی گاڑی کے ٹائر تبدیل کروائے، 2022 میں سابق وزیر اعلیٰ پنجاب کی اسی گاڑی کے 5 ٹائرز تبدیل کیے گئے تھے۔
انہوں نے کہا کہ کیا ہم اپنی گاڑیوں کی مینٹینس نہیں کرواتے، ٹائر نہیں تبدیل کرواتے کہ وزیر اعلیٰ پنجاب کی گاڑی کے ٹائر بدلے گئے تو یہ ایک انہونی بات ہوگئی۔ مریم نواز تنخواہ لے رہی ہیں نہ ہی پروٹوکول لے رہی ہیں، نہ ہی کوئی گھر لیا ہے، ان کا تو کسی قسم کا کوئی سرکاری خرچ نہیں ہے۔
عظمیٰ بخاری نے گاڑی کے ٹائر والی خبر پر شور مچانے والوں کو جاہل قرار دے دیا @AzmaBokhariPMLN @arifawan779 @MaryamNSharif pic.twitter.com/eTZWw6jZzA
— WE News (@WENewsPk) March 14, 2024
عظمیٰ بخاری نے کہا کہ وزیر اعلیٰ پنجاب یہ گاڑی لے کر گھر نہیں جا رہی ہیں کہ ان پر تنقید کی جا رہی ہے، یہ وہی گاڑی ہے جو سابق وزرائے اعلیٰ عثمان بزدار نے بھی استعمال کی، پرویز الہٰی نے بھی استعمال کی۔ یہ آرمڈ مرسڈیزہے اور اس کے لیے بھی وزیر اعلیٰ کو استعمال کرنے کے لیے آمادہ کرنا پڑا، وہ یہ بھی استعمال نہیں کرنا چاہتی تھیں لیکن سیکیورٹی وجوہات کی بنا پر انہیں اس پر آمادہ کرنا پڑا۔
انہوں نے کہا کہ یہ جو ایشو بنا رہے ہیں ان سے پوچھا جائے وہ اپنی گاڑیوں کے ٹائر نہیں بدلتے، انہوں نے کہا کہ یہ لوگ یہ نہیں کہہ سکتے کہ مریم نواز کام نہیں کر رہی، یہ لوگ ایسا بھی نہیں کہہ سکتے کہ وزیر اعلیٰ گھر بیٹھی ہوئی ہے، یہ لوگ یہ بھی نہیں کہہ سکتے کہ مریم نواز نیسلے کو نیسپاک کہتی ہے، اس لیے ان کو کہنے کو کچھ نہیں مل رہا اس لیے ایشو بنا رہے ہیں۔
واضح رہے کہ وزیراعلیٰ پنجاب مریم نواز کی سرکاری گاڑی کے ٹائروں کی تبدیلی کے لیے محکمہ خزانہ سے 2 کروڑ 73 لاکھ روپے طلب کرنے کا انکشاف ہواتھا۔
وزیر اطلاعات پنجاب عظمیٰ بخاری نے اس حوالے سے ایک نجی ٹی وی چینل سےگفتگو کے دوران بتایا کہ سرکاری گاڑی کے لیےگرانٹ طلب کرنا معمول کی بات ہے۔ مرسڈیز گاڑی کے ٹائر 10 ہزار کلو میٹر تک چلنے کے بعد بدلنا ضروری ہوتے ہیں۔
