وزیراعلیٰ پنجاب مریم نواز شریف نے عوام سے اپیل کی ہے کہ وہ صوبے میں صفائی مہم میں حکومت پنجاب کا ساتھ دیں، لاہور کی تعمیر و ترقی کے لیے بھی متعلقہ حکام کو 3 ماہ کی ڈیڈ لائن دے دی۔
وزیراعلیٰ پنجاب مریم نواز کی زیرصدارت اجلاس میں لاہور کی تعمیروترقی پلان پر غور کیا گیا، اجلاس میں وزیراعلیٰ مریم نواز نے متعلقہ حکام کو ڈیڈ لائن دی کہ 3 ماہ میں یہ منصوبہ مکمل کیا جائے، وزیراعلیٰ نے کہا کہ وہ ہر10 دنوں بعد اس منصوبے پر عملدرآمد کا جائزہ لیں گی۔
مزید پڑھیں
اجلاس میں فیصلہ کیا گیا کہ لاہور کی تمام چھوٹی بڑی سڑکوں کی تعمیر نو و مرمت کی جائے گی، اجلاس میں وزیراعلیٰ مریم نواز نے لاہور کی گلیاں پکی کرنے اور ٹف ٹائلز لگانے کے پروجیکٹ کی بھی منظوری دی ہے۔
اجلاس میں لاہور میں 2لاکھ 22 ہزار اسٹریٹ لائٹس کی بحالی کا اصولی فیصلہ کیا گیا اور لاہور کے 9 زونز میں ڈرینج اور سیوریج کی بحالی، تعمیر ومرمت کا جائزہ بھی لیا گیا۔
اس موقع پر سیور ماسٹر پلان اور واٹر ٹینک بنانے کے پراجیکٹ پر غور کیا گیا اور مریم نواز نے متعلقہ حکام سے جامع پلان طلب کرلیا ہے، واسا کو مشینری اور افرادی قوت کی ضروریات سے آگاہ کرنے کی ہدایت بھی کی ہے۔
اجلاس میں لاہور کے تمام علاقے بتدریج واسا سروسز ایریا میں شامل کرنے کا اصولی فیصلہ کیا گیا، وزیراعلیٰ مریم نواز نے لاہور کے تمام واٹر فلٹریشن پلانٹ فنکشنل کرنے کے لیے متعلقہ حکام کو احکامات جاری کیے۔
وزیراعلیٰ پنجاب نے اجلاس میں شرکاء سے گفتگو میں کہا کہ وہ ہر گلی محلے کو صاف دیکھنا چاہتی ہیں، صفائی کی مہم میں عوام بھی حکومت کا ساتھ دیں۔
