انسپکٹر جنرل پولیس (آئی جی) سندھ غلام نبی میمن نے کچے کے ڈاکوؤں کے خلاف آپریشن میں کامیابی یقینی بنانے کے لیے احکامات دیدیے۔
اجلاس میں لاڑکانہ و سکھر کے ڈی آئی جیز کے علاوہ سکھر، شکارپور اور کشمور کے ایس ایس پیز نے ویڈیو لنک کے ذریعے شرکت کی۔
آئی جی سندھ کو پولیس افسران کی جانب سے ڈاکوؤں کے خلاف غیر معمولی حکمت عملی و انٹیلی جینس بیسڈ آپریشنز جیسے اقدامات کے نتائج اور کامیابی پر علیحدہ علیحدہ بریفنگ دی اور گزشتہ اجلاس کے احکامات پر تعمیلی رپورٹس سے آگاہ کیا۔
مزید پڑھیں
اجلاس میں ڈی آئی جی ہیڈکوارٹرز سندھ، اے آئی جی آپریشنز اور ایس ایس پی گھوٹکی نے بالمشافہ شرکت کی۔
آئی جی سندھ نے ڈاکوؤں سے پولیس مقابلے کے دوران عمدہ کارکردگی کا مظاہرہ کرنے پر ایس ایس پی کشمور کے لیے 5 لاکھ روپے نقد انعام اور سی سی ون سرٹیفیکیٹ کا اعلان کیا۔
انہوں نے کہاکہ کچے کے علاقہ میں قائم پولیس پکٹس پر تعینات افسران و اہلکاروں کو مستعد اور چوکنا رکھنے کے لیے تمام تر مثبت اقدامات کیے جائیں۔ ہائی ویز پر قائم بڑی پکٹس پر 15/15 جوان تعینات کیے جائیں تاکہ ہائی ویز کے مسافروں کو محفوظ کیا جاسکے۔
انہوں نے کہاکہ کچے کے علاقوں میں انٹیلی جینس نیٹ ورک کو مزید مضبوط اور مربوط بنایا جائے۔ ڈاکوؤں کی آماجگاہوں، پناہ گاہوں اور ان کے سہولتکاروں کے خلاف دستیاب فہرستوں کے مطابق سخت ایکشن کو یقینی بنایا جائے۔
انسپکٹر جنرل پولیس نے کہاکہ حراست میں لیے جانے والے ملزمان کے خلاف ایف آئی آر درج کی جائے جبکہ نامعلوم ملزمان کے خلاف درج مقدمات میں شناخت پریڈ کو لازمی بنایا جائے۔
انہوں نے کہاکہ انویسٹی گیشن الاؤنس شعبہ تفتیش کو سندھ کی سطح پر دیا جائے گا۔
آئی جی سندھ نے کہا کہ ڈاکوؤں کے خلاف ایکشن میں نا صرف حکومت سندھ بلکہ میں بذات خود بھی شانہ بشانہ ہوں۔
