پاکستان بھر میں نماز عید کے خصوصی اجتماعات ہوئے، جن میں پاکستان کی ترقی و خوشحالی کے لیے دعائیں مانگی گئیں۔ اس موقع پر مختلف سیاسی اور سماجی شخصیات نے اپنے اپنے آبائی علاقوں نمازعید ادا کی۔
وزیراعظم شہباز شریف:
وزیراعظم شہباز شریف نے بدھ کو لاہور میں عید الفطر کی نماز ادا کی۔انہوں نے ملک و قوم کی ترقی و خوشحالی اور امت مسلمہ کی یکجہتی کے لیے خصوصی دعا کی۔نماز عید کی ادائیگی کے بعد انہوں نے لوگوں کو عید کی مبارکباد دی۔
میڈیا سے گفتگو کرتے ہوئے انہوں نے کہا کہ عید مناتے ہوئے قوم کو ان بھائیوں اور بہنوں کو یاد رکھنا چاہیے جنہیں مدد کی ضرورت ہے۔
ہم مظلوم کشمیریوں اور فلسطینیوں کی حمایت میں آواز بلند کریں
انہوں نے قوم سے کہا کہ وہ پاکستان کو قائداعظم محمد علی جناح اور علامہ محمد اقبال کے ویژن کے مطابق اسلامی فلاحی ریاست بنانے کا عہد کریں۔انہوں نے کہا کہ آئیے ہم ان لوگوں کا خیال رکھنے کا اعادہ کریں جنہیں ہماری ضرورت ہے اور ہم مظلوم کشمیریوں اور فلسطینیوں کی حمایت میں آواز بلند کریں جن کا خون آج بھی بہایا جا رہا ہے۔
وفاقی وزیر اطلاعات و نشریات عطاء اللہ تارڑ اور حمزہ شہباز نے بھی وزیراعظم کے ہمراہ نماز ادا کی۔
صدر آصف علی زرداری
صدر مملکت آصف علی زرداری نے نواب شاہ میں عید الفطر کی نماز ادا کی۔ صدر مملکت آصف علی زرداری نے ملک کی سلامتی، خوشحالی اور ترقی کے لیے دعا کی۔ صدر مملکت اس موقع پر مسجد میں موجود لوگوں سے ملے اور عید کی مبارکباد دی۔
صدر اور وزیراعظم کا ٹیلیفونیک رابطہ
صدر مملکت آصف علی زرداری اور وزیر اعظم محمد شہباز شریف کا ٹیلی فونک رابطہ ہوا۔صدر مملکت آصف علی زرداری نے وزیرِ اعظم شہباز شریف کو عید کی مبارکباد دی۔ ایوان صدر کے پریس ونگ کے مطابق صدر مملکت اور وزیرِ اعظم نے ایک دوسرے کے لیے نیک تمناؤں کا اظہار کیا۔
