لاہور کی کوٹ لکھپت جیل میں بھارتی دہشتگرد سربجیت سنگھ پر حملہ کرنے والے عامر تانبا پر قاتلانہ حملہ ہوا ہے جس میں وہ شدید زخمی ہوگیا۔
پولیس نے بتایا ہے کہ نامعلوم موٹرسائیکل سواروں نے اسلام پورہ میں عامر تانبا پر فائرنگ کی ہے جس سے وہ زخمی ہوگیا۔
مزید پڑھیں
پولیس کے مطابق عامر تانبا کو شدید زخمی حالت میں اسپتال منتقل کردیا گیا ہے جبکہ حملہ آوروں کی تلاش کی جارہی ہے۔
پولیس نے مزید بتایا کہ عامر تانبا جو کوٹ لکھپت جیل میں قید تھا کچھ ہی عرصہ قبل رہا ہوا تھا۔
ادھر پولیس نے عامر تانبا پر قاتلانہ حملے کا مقدمہ بھی درج کر لیا ہے، جس کے مطابق 2 حملہ آور موٹرسائیکل سواروں نے گھر میں آکر انہیں گولیاں ماریں اور بھاگ گئے۔
واضح رہے کہ 2013 میں کوٹ لکھپت جیل میں قید 2 افراد عامر تانبا اور مدثر پر الزام تھا کہ انہوں نے بھارتی دہشتگرد سربجیت سنگھ پر حملہ کیا۔
سربجیت سنگھ حملہ میں شدید زخمی ہونے کے باعث اسپتال میں ہی دم توڑ گیا تھا۔
