بھارتی ریاست گجرات میں ایک کاروباری فیملی کا خوب چرچا ہورہا ہے جس نے زندگی بھر کی جمع پونجی تقریباً 200 کروڑ روپے مالیت کی تمام جائیداد غریبوں میں بانٹ دی اور خاندان کے تمام افراد بھکشو بن بیٹھے۔
مزید پڑھیں
بھارتی میڈیا کے مطابق، جین برادری سے تعلق رکھنے والے ریاست گجرات کے ضلع سابرکانتھا کے علاقے ہمت نگر کے رہاشی بھویش بھائی بھنڈاری اور ان کی اہلیہ نے اپنی تمام تر دولت اور زندگی کی تمام آسائشوں کو خیرباد کہنے اور بقیہ زندگی بھکشو کے طور پر گزارنے کا فیصلہ کیا۔
ان کے اس فیصلے نے لوگوں کو حیران کردیا ہے اور بھارتی سوشل میڈیا پر اس خاندان کے فیصلے کے بارے میں بحث چھڑی ہوئی ہے۔
بھویش بھائی بھنڈاری گجرات کی ایک بڑی اور امیر کاروباری فیملی سے تعلق رکھتے ہیں۔ بھویش بھائی کنسٹرکشن کے کاروبار سے وابستہ تھے اور ان کے سابرکانتھا اور احمد آباد میں دفاتر تھے۔
بھنڈاری خاندان کا تعلق جین برادری سے ہے جس کے بارے میں مشہور ہے کہ وہ بھکشوؤں اور یاتریوں سے جڑے رہتے ہیں۔ بھویش بھائی اور ان کی اہلیہ نے اب مادی زندگی اور اشیا جیسا کہ پنکھے، ایئر کنڈیشنرز اور موبائل فون وغیرہ کو چھوڑنے کا فیصلہ کیا ہے۔
اس جوڑے نے یہ فیصلہ اپنے بچوں سے متاثر ہوکر کیا ہے جو ان سے پہلے ہی بھکشوؤں کی زندگی بسر کررہے ہیں۔ بھویش بھائی کی 19 سالہ بیٹی اور 15 سالہ بیٹے نے 2022 میں بھکشو بننے کا فیصلہ کیا تھا۔ اپنے بچوں کو دیکھ کر بھویش بھائی اور ان کی بیوی نے بھی بھکشوؤں والی زندگی بسر کرنے کا فیصلہ کیا۔
اس حوالے سے ہمت نگر میں ایک بڑے اجتماع کا انعقاد کیا گیا تھا۔ 4 کلومیٹر طویل اس اجتماع میں ہزاروں افراد شریک تھے جبکہ اس اجتماع میں بھویش بھائی اور ان کی اہلیہ کے علاوہ 35 دیگر افراد نے بھکشو بننے کا عہد کیا تھا۔ اب یہ تمام افراد 22 اپریل کو ایک تقریب میں باقاعدہ طور پر زندگی کا نیا سفر شروع کرنے کا اعلان کریں گے۔
