وزیراعلیٰ پنجاب مریم نواز کی زیرصدارت اجلاس میں 50 ہزار گھرانوں کو ون کے وی کے سولر سسٹم دینے کی اصولی منظوری دیدی گئی۔
پیر کو وزیراعلیٰ مریم نواز کی زیر صدارت خصوصی اجلاس ہوا جس میں ایک کلو واٹ کے سولر سسٹم کے حوالے سے ٹیکنیکل امور پر بریفنگ دی گئی۔
مزید پڑھیں
بریفنگ میں بتایا گیا کہ 100 یونٹ تک بجلی خرچ کرنے والے پروٹیکٹڈ صارفین سولر سسٹم حاصل کرنے کے اہل ہوں گے۔
ون کے وی سسٹم میں 2 سولر پلیٹیں، بیٹری، انورٹر اور تاریں دی جائیں گی۔ ’ون کے وی سولر سسٹم سے پنکھے، لائٹیں، چھوٹی موٹر وغیرہ چلائی جاسکے گی اور لیتھیم آئرن بیٹری کے ذریعے 16 گھنٹے تک بیک اپ حاصل کیا جاسکے گا۔
اجلاس میں وزیراعلیٰ پنجاب مریم نواز نے روشن گھرانہ پروگرام کے تحت فوری طور پر پائلٹ پراجیکٹ شروع کرنے اور جدید ترین ٹیکنالوجی کے حامل سولر سسٹم انسٹال کرنے کی ہدایت کی۔
وزیراعلیٰ نے مختلف گھروں میں سولر سسٹم لگا کرافادیت کا جائزہ لینے کا حکم بھی جاری کیا۔
مریم نواز نے کہاکہ گھریلو صارفین کے لیے سولر سسٹم کا دائرہ کار بتدریج بڑھایا جائےگا اور روشن گھرانہ پروگرام کا مقصدغریب آدمی کو مہنگی بجلی سے نجات دلانا ہے۔
اجلاس میں سینیئر صوبائی وزیر مریم اورنگزیب، وزیر اطلاعات عظمیٰ زاہد بخاری، سینیٹر پرویز رشید، ایم پی اے ثانیہ عاشق، چیف سیکریٹری، چیئرمین پی اینڈ ڈی، سیکریٹریز انرجی، خزانہ، چیف ایگزیکٹو آفیسر پی پی ڈی سی ایل، مینیجنگ ڈائریکٹر پی پی ڈی بی اور دیگر حکام نے شرکت کی۔
