برطانیہ میں ایک سٹوڈیو اپارٹمنٹ وائرل ہوا ہے جس کے لیونگ روم میں قیدیوں کو بند کرنے والی حوالات بھی موجود ہے۔
ٹیلرز پراپرٹی ایجنٹس کی ویب سائٹ کے مطابق یہ اپارٹمنٹ پولیس اسٹیشن کی پرانی عمارت میں واقع ہے۔ یہ تھانہ 2017 میں بند ہوا تھا جس کے بعد اس کی عمارت میں بلاکوں کی شکل میں فلیٹ بنا دیے گئے تھے۔
تاہم فلیٹوں کے ڈیزائن بنانے والے آرکیٹیکٹ کے ذہن میں اچھوتا خیال آیا کہ کم از کم ایک فلیٹ میں وہ حوالات برقرار رہنے دی جائے جہاں کبھی پولیس قیدیوں کو بند کرتی تھی۔
حوالات والے اس انوکھے فلیٹ نے سوشل میڈیا صارفین کو اپنی طرف متوجہ کیا جو اسے کرایے پر لینے کی خواہش کا اظہار کر رہے ہیں۔
Obsessed that the old Dudley police station has been converted to studio flats, and for one of the advertised lettings they’ve kept the holding cell as a “feature”. pic.twitter.com/RcIeZdomWg
— Liam (@L4nkyLi4m) April 21, 2024
واضح رہے کہ اس فلیٹ کا ماہانہ کرایہ 750 پاؤنڈ یعنی تقریباً 2 لاکھ 58 ہزار روپے ہے۔
فلیٹ تمام سہولیات سے آراستہ ہے۔ ماڈرن فرش، سیلنگ، اوپن کچن، اور لش پش باتھ رومز۔
دوسری جانب سوشل میڈیا صارفین فلیٹ میں موجود حوالات کے استعمال پر دلچسپ پوسٹس اور کمنٹس کر رہے ہیں۔
ایک صارف نے لکھا کہ یہ شرارتی بچوں کے لیے بہترین ہے۔ جب وہ باز نہ آئیں تو سیدھا حوالات میں ڈال دو۔
ایک دوسرے صارف کے خیال میں یہ حوالات ورک فرام ہوم کے لیے دفتر بنایا جا سکتا ہے۔ اس کی سلاخوں پر پھولدار پودوں کی بیلیں چڑھا دی جائیں۔
