پاکستان کے لیجنڈاداکار معین اختر کو مداحوں سے بچھڑے 13 برس بیت چکے ہیں مگر انڈسٹری سے ان کی عزیز دوست بشریٰ انصاری انہیں آج تک بھلا نہ پائیں۔ اداکارہ نے ان کی 13 برسی پر انہیں یاد کرتے ہوئےخراجِ عقیدت پیش کیا اور انہیں یاد کرتے ہوئے جذباتی ہوگئیں۔
اداکارہ نے اپنے آفیشل یو ٹیوب چینل کی ایک ویڈیو میں بتایا کہ کچھ دوست اور ساتھیوں کے بچھڑنے کا غم بھی اپنوں کے بچھڑنے کے غم سے کم نہیں ہوتا جن کو یاد کرنے پر دل اداس ہوجاتا ہ۔ آج معین اختر کی برسی کے موقع پر اس کی یاد بے ساختہ آئی اور ان کے ساتھ شوٹنگ میں گزرا ہوا وقت ، شرارتیں ڈانٹ ڈپٹ سب باتیں ذہن میں گردش کرنے لگی ہیں۔
پرانی یادیں تازہ کرتے ہوئے یہ بھی بتایا کہ میں نے اور معین نے ریڈیو پاکستان اور پی ٹی وی پر کام کرنے علاوہ اسٹیج پر بھی کافی عرصے ساتھ کام کیا جہاں ہم پپٹ شو کیا کرتے تھے۔
اداکارہ نے نم آنکھوں کے ساتھ معین اختر کے انتقال سے ایک ماہ قبل کا واقعہ شیئر کیا اور بتایا کہ میں نے 23 مارچ کے ایک پروگرام میں معین کو دیکھا تو وہ بہت زیادہ کمزور دکھائی دے رہے تھے جس کے بعد میں نے فون کرکے ان کی خیریت دریافت کی تو انہوں نے مجھے ٹال دیا اور کہا کہ پریشانی کی کوئی بات نہیں ہے اور پھر اگلے ماہ اپریل میں ہی وہ انتقال کر گئے۔
اداکارہ نے بتایا کہ معین اختر کو دل کے عارضے کے علاوہ بھی دیگر کئی بیماریاں لاحق تھیں جن کا انہوں نے کبھی کسی سے ذکر نہیں کیا بلکہ آخری وقت تک وہ اپنے کام میں مگن رہے۔
